മലയാളികളുടെ ഇഷ്ട നടനാണ് അജു വർഗീസ്. അവതരിപ്പിക്കുന്ന എല്ലാ കഥാപാത്രങ്ങളും മലയാളികളുടെ മനസ്സിൽ ഇടം നേടാറുണ്ട്. തന്നെക്കുറിച്ചുള്ള ട്രോളുകളും ഫേസ്ബുക്കിലൂടെ അജു ഷെയര്‍ ചെയ്യാറുണ്ട്. ഒപ്പം പുതിയ സിനിമകളുടെ വിവരങ്ങളും അദ്ദേഹം പങ്കുവെക്കാറുണ്ട്. ഇപ്പോഴിതാ അജു വര്‍ഗീസ് ഷെയര്‍ ചെയ്ത തന്‍റെ പുതിയ കഥാപാത്രത്തിന്‍റെ ഗെറ്റപ്പിനെക്കുറിച്ചാണ് ആരാധകര്‍ക്കിടയിലെ ചര്‍ച്ച.
തൂവെള്ള നിറത്തിലുള്ള ഖദർ ഷർട്ടും വളർത്തിയ താടിയും കൂളിംഗ് ഗ്ലാസും വെച്ച അജു വർഗീസിൻ്റെ ചിത്രം അടുത്തിടെ ഇറങ്ങിയ മോഹൻലാൽ നായകനായി എത്തിയ പൃഥ്വിരാജ് സുകുമാരൻ സംവിധാനം ചെയ്ത ലൂസിഫർ എന്ന ചിത്രത്തിലെ മോഹൻലാലിൻ്റെ കഥാപാത്രവുമായി സാമ്യമുണ്ടെന്നാണ് ആരാധകരുടെ കമൻ്റുകൾ. ലൂസിഫറിൽ മോഹൻലാൽ അവതരിപ്പിച്ച കഥാപാത്രത്തിൻ്റെ പേര് സ്റ്റീഫൻ നെടുമ്പള്ളി എന്നായിരുന്നു. അജു വർഗീസിൻ്റെ ചിത്രം കണ്ട് ആരാധകർ ചോദിക്കുന്നത് ഇത് സ്റ്റീഫൻ നെടുമ്പള്ളി ലൈറ്റ് ആണോ എന്നാണ്.
അജു വർഗീസ് പങ്കുവെച്ച് പോസ്റ്റിൽ ഈ കഥാപാത്രം ഏത് ചിത്രത്തിന് വേണ്ടി ഉള്ളതാണ് എന്ന് കുറിച്ചിട്ടുണ്ട്. ഉണ്ണി മുകുന്ദനെ നായകനാക്കി നവാഗതനായ വിഷ്‍ണു മോഹന്‍ സംവിധാനം ചെയ്യുന്ന ‘മേപ്പടിയാന്‍’ എന്ന ചിത്രത്തിലേതാണ് അജുവിന്‍റെ പുതിയ ലുക്ക്. ഒരു രാഷ്ട്രീയ പ്രവർത്തകൻ്റെ വേഷമാണ് അജുവർഗീസ് അതിൽ കൈകാര്യം ചെയ്യുന്നത്. കഥാപാത്രത്തിൻ്റെ പേര് തടത്തിൽ സേവ്യർ എന്നാണ്.
