കമലയ്ക്ക് ശേഷം അജു വർഗീസ് വീണ്ടും നായകനായി എത്തുന്ന ചിത്രമാണ് സാജൻ ബേക്കറി സിൻസ് 1962. അരുൺ ചന്തു സംവിധാനം ചെയ്യുന്ന ഈ ചിത്രം നിർമ്മിക്കുന്നത് ഫൺന്‍റാസ്റ്റിക് ഫിലിംസിന്‍റെ ബാനറിൽ ധ്യാൻ ശ്രീനിവാസനും വിശാഖ് സുബ്രഹ്മണ്യനും ചേർന്നാണ്. എം സ്റ്റാര്‍ സാറ്റലൈറ്റ് കമ്മ്യൂണിക്കേഷൻസിന്‍റെ ബാനറിൽ അനീഷ്‌ മോഹൻ സഹനിർമാണം ചെയുന്ന ചിത്രത്തിൽ അജു വർഗീസിന് പുറമെ ലെന, ഗ്രേസ് ആന്‍റണി, രഞ്ജിത മേനോൻ, ഗണേഷ് കുമാർ, ജാഫർ ഇടുക്കി തുടങ്ങി നിരവധി താരങ്ങൾ അണിനിരക്കുന്നുണ്ട്.സംവിധായകൻ അരുൺ ചന്തു സാജൻ ബേക്കറിക്ക് മുൻപ് സായാഹ്നവാർത്തകൾ എന്നൊരു ചിത്രവും ഒരുക്കിയിരുന്നു. ഗോകുൽ സുരേഷ് നായകനായി എത്തിയ ഈ ചിത്രം പക്ഷെ തിയറ്ററുകളിൽ ഇതുവരെ എത്തിയിരുന്നില്ല. ഇപ്പോൾ സാജൻ ബേക്കറിയും സായാഹ്നവാർത്തകളും ഏകദേശം ഒരേസമയം തിയറ്ററുകളിൽ എത്തുമെന്നാണ് ലഭിക്കുന്ന റിപ്പോർട്ടുകൾ.
ഇത് സംബന്ധിച്ച് ഒരു രസകരമായ ട്രോൾ അജു വർഗീസ് തന്റെ ഫേസ്ബുക്ക് പേജിൽ പോസ്റ്റ് ചെയ്യുകയുണ്ടായി. “രണ്ട് സിനിമകൾ ഒരുമിച്ചു റിലീസിന് നിൽക്കുന്ന ലോകത്തെ ആദ്യത്തെ പുതുമുഖ സംവിധായകൻ നീയാണോ കുഞ്ഞേ ?” എന്നാണ് അജു വർഗീസ് ഫേസ്ബുക്കിൽ കുറിച്ചത്.
