ഫഹദ് ഒരു അസാമാന്യ നടനാണെന്ന് തെലുങ്ക് സൂപ്പര്‍ താരം അല്ലു അര്‍ജുന്‍. ഒരു ഓണ്‍ലൈന്‍ മീഡിയയ്ക്കു നല്‍കിയ അഭിമുഖത്തിലാണ് താരം ഇങ്ങനെ പറഞ്ഞത്. അല്ലു അര്‍ജുനും ഫഹദും പ്രധാന കഥാപാത്രങ്ങളായെത്തുന്ന ‘പുഷ്പ’യില്‍ ഒന്നിച്ചഭിനയിച്ച അനുഭവം പങ്കു വെക്കുകയായിരുന്നു അല്ലു അര്‍ജുന്‍. ഫഹദിനൊപ്പം അഭിനയിക്കുകയെന്നത് എന്നെ സംബന്ധിച്ച് മികച്ച അനുഭവമായിരുന്നു. അദ്ദേഹത്തിന്റെ മിക്ക സിനിമകളും ഞാന്‍ കണ്ടിട്ടുണ്ട്, അവയിലെ പ്രകടനങ്ങളും ആസ്വദിച്ചിട്ടുണ്ട്.
ഫഹദ് അഭിനയിക്കുന്നത് നേരില്‍ കാണാന്‍ സാധിച്ചത് സന്തോഷകരമായിരുന്നു. രാജ്യത്തെ തന്നെ ഏറ്റവും മികച്ച അഭിനേതാക്കളില്‍ ഒരാളാണ് ഫഹദ്. അദ്ദേഹത്തിന്റെ രീതികള്‍ എന്നെ വല്ലാതെ ആകര്‍ഷിച്ചു. പ്രോംപ്റ്റ് ചെയ്ത് അഭിനയിക്കുന്ന രീതി അദ്ദേഹം സ്വീകരിക്കാറില്ലെന്നത് എന്നെ അദ്ഭുതപ്പെടുത്തി. അദ്ദേഹം തന്റെ ഡയലോഗുകള്‍ സ്വയം എഴുതി പഠിച്ചാണ് പറയുന്നത്. ഭാഷ അറിയാത്ത ഒരു നടന്‍ അങ്ങനെ ചെയ്യുന്നത് ഒരിക്കലും ഞാന്‍ കണ്ടിട്ടില്ല. തെലുങ്ക് നന്നായി അറിയുന്ന ആളെ പോലെയായിരുന്നു അദ്ദേഹത്തിന്റെ സംസാരം. എനിക്കും സംവിധായകനും മറ്റു അണിയറപ്രര്‍ത്തകര്‍ക്കും അദ്ദേഹത്തോട് ആദരവാണ് തോന്നിയത്.
അല്ലു അര്‍ജുന്‍ നായകനായി എത്തുന്ന പുഷ്പയുടെ ട്രയിലറിന് വന്‍ സ്വീകാര്യതയാണ് ലഭിച്ചത്. പുഷ്പ ഒന്നാം ഭാഗത്തിന്റെ ട്രയിലര്‍ ആണ് ഇപ്പോള്‍ പുറത്തിറങ്ങിയിരിക്കുന്നത്. ചിത്രം ഡിസംബര്‍ 17ന് തിയറ്ററുകളില്‍ എത്തും. ‘പുഷ്പ – ദ റൈസ്’ എന്നാണ് ആദ്യഭാഗത്തിന്റെ പേര്. ഫഹദ് ഫാസിലാണ് ചിത്രത്തില്‍ വില്ലനായി എത്തുന്നത്. ബന്‍വര്‍ സിംഗ് ഷെക്കാവത്ത് ഐ പി എസ് എന്ന പൊലീസുകാരനായാണ് ഫഹദ് എത്തുന്നത്. ട്രയിലറിന്റെ അവസാന ഭാഗത്ത് ഫഹദ് എത്തുന്നുണ്ട്. ഫഹദിന്റെ ആദ്യ തെലുങ്ക് ചിത്രം കൂടിയാണ് ഇത്. സുകുമാര്‍ ആണ് ചിത്രം സംവിധാനം ചെയ്തിരിക്കുന്നത്. ആര്യ എന്ന ചിത്രത്തിലൂടെ അല്ലുവിനെ സൂപ്പര്‍താരമാക്കിയ സംവിധായകനാണ് സുകുമാര്‍.
