തീയറ്റര് ഉടമകളുടെ സംഘടനയായ ഫിയോക്കില് നിന്ന് നേരത്തേ രാജിവച്ചതെന്ന് നിര്മാതാവ് ആന്റണി പെരുമ്പാവൂര്. രാജിവച്ച ആളെ എങ്ങനെ പുറത്താക്കുമെന്നും ആന്റണി പെരുമ്പാവൂര് ചോദിച്ചു. സംഘടനയ്ക്ക് ഗുണം ചെയ്യുമെങ്കില് നിയമാവലിയില് മാറ്റം വരുത്തട്ടെയെന്നും രാജി അംഗീകരിച്ചതായിട്ട് സംഘടന ഇതുവരെ വിവരം നല്കിയിട്ടില്ലെന്നും ആന്റണി പെരുമ്പാവൂര് പറഞ്ഞു.
ഫിയോക്കില് നിന്ന് നടന് ദിലീപിനെയും ആന്റണി പെരുമ്പൂവൂരിനെയും പുറത്താക്കാന് നീക്കം നടക്കുന്നതായി വാര്ത്തകള് പുറത്തുവന്നിരുന്നു. ഇതുമായി ബന്ധപ്പെട്ടാണ് ആന്റണി പെരുമ്പാവൂരിന്റെ പ്രതികരണം. ഇരുവരെയും പുറത്താക്കാന് ഭരണഘടന ഭേദഗതി ചെയ്തേക്കുമെന്ന് റിപ്പോര്ട്ട് ഉണ്ടായിരുന്നു. സംഘടനയുടെ ജനറല് ബോഡി യോഗം ഈ മാസം 31 ന് ചേരുന്നുണ്ട്. ഈ യോഗത്തില് തുടര്നടപടി സംബന്ധിച്ച് തീരുമാനമുണ്ടായേക്കുമെന്നാണ് റിപ്പോര്ട്ട്.
ദിലീപും ആന്റണി പെരുമ്പാവൂരും ചേര്ന്ന് നിര്മിച്ച സംഘടനയാണ് ഫിയോക്. സംഘടനയുടെ ആജീവനാന്ത ഭാരവാഹികളാണ് ഇരുവരും. ദിലീപ് ആജീവനാന്ത ചെയര്മാനും ആന്റണി പെരുമ്പാവൂര് ആജീവനാന്ത വൈസ് ചെയര്മാനുമാണ്. കൊവിഡിന് ശേഷം സിനിമകള് ഒ.ടി.ടി റിലീസിലേക്ക് കൂടുതലായി എത്തിയ പശ്ചാത്തലത്തില് ഫിയോക് ഭാരവാഹികളായിട്ട് കൂടി ഇരുവരും ഒ.ടി.ടി റിലീസിനെ പിന്തുണക്കുന്ന നടപടിയില് പ്രതിഷേധിച്ചാണ് ഇരുവരെയും പുറത്താക്കാന് നീക്കം നടത്തുന്നത്.