സംവിധായകൻ എൽ വിജയ്യുമായുള്ള അമല പോളിന്റെ വിവാഹമോചനത്തിന് കാരണം ധനുഷ് ആണെന്ന തരത്തിലുള്ള വാർത്തകൾ സോഷ്യൽ മീഡിയയിൽ പ്രചരിച്ചിരുന്നു. ഇപ്പോൾ അതിന് പ്രതികരണവുമായി എത്തിയിരിക്കുകയാണ് അമലാപോൾ. ഒരു തമിഴ് ഓൺലൈൻ പോർട്ടലിന് നൽകിയ അഭിമുഖത്തിനിടെയാണ് വിവാഹമോചനത്തെ സംബന്ധിച്ച വാർത്തകളിൽ താരം തന്റെ നിലപാട് വ്യക്തമാക്കിയത്. സോഷ്യൽ മീഡിയയിൽ പ്രചരിക്കുന്നതെല്ലാം അനാവശ്യ വിവാദങ്ങൾ ആണെന്നും തന്റെ വ്യക്തിപരമായ ഒരു തീരുമാനം ആണ് വിവാഹമോചനം എന്നും അതിൽ മറ്റാർക്കും പങ്കില്ല എന്നും അമല പറയുന്നു. ഇപ്പോൾ മറ്റൊരു വിവാഹത്തെപ്പറ്റി ചിന്തിക്കുന്നില്ല എന്നും പുതിയ ചിത്രങ്ങളുടെ റിലീസിനു ശേഷം തന്റെ വിവാഹത്തെ പറ്റി താൻ തന്നെ ജനങ്ങളെ അറിയിക്കുന്നതായിരിക്കും എന്നും താരം പറയുന്നു.
അമല പോളും സംവിധായകൻ എൽ വിജയ്യുമായുള്ള വിവാഹമോചനത്തിന് കാരണം ധനുഷ് ആണെന്ന ആരോപണവുമായി നിർമാതാവ് അളകപ്പൻ രംഗത്ത് വരികയും ആ വെളിപ്പെടുത്തൽ തമിഴ് സിനിമ മേഖലയിൽ വലിയ തരംഗം സൃഷ്ടിക്കുകയും ചെയ്തിരുന്നു. വിവാഹശേഷം അമല പോൾ അഭിനയിക്കുന്നില്ലെന്നു സമ്മതിച്ചിരുന്നു എങ്കിലും ധനുഷ് നിർമിച്ച അമ്മ കണക്ക് എന്ന ചിത്രത്തിൽ അഭിനയിക്കാനുള്ള കരാറിൽ അമല നേരത്തെ ഒപ്പിട്ടിരുന്നതിനാൽ ധനുഷ് അമലയെ അഭിനയത്തിലേക്ക് തിരികെ വരാൻ നിർബന്ധിക്കുകയും ചെയ്തു. അമല നായികയാവുന്ന സെഞ്ച്വറി ഫിലിംസ് ഇന്റർനാഷ്ണൽ നിർമിക്കുന്ന ‘അതോ അന്ത പറവൈ പോല’ എന്ന ചിത്രം ഫെബ്രുവരി 28ന് റിലീസ് ചെയ്യും.
