മലയാള സിനിമയിലെ ആദ്യ ട്രാൻസ്ജെൻഡർ നായിക എന്ന ബഹുമതിക്ക് ഉടമയാണ് അഞ്ജലി അമീർ. ഈയടുത്ത് ബിഗ് ബോസിലും താരം മുഖം കാണിച്ചിരുന്നു. മമ്മൂട്ടി നായകനായ തമിഴ് ചിത്രം പേരൻപിൽ ഗംഭീര പ്രകടനമാണ് അഞ്ജലി അമീർ കാഴ്ചവെച്ചത്. പാതിവഴിയിൽ മുടങ്ങിയ പഠനം ഇപ്പോൾ പുനരാരംഭിക്കാൻ ഒരുങ്ങുകയാണ് അഞ്ജലി അമീർ.പ്ലസ് ടുവില്‍ മുടങ്ങിയ പഠനം ഈ വര്‍ഷം പുനരാരംഭിക്കാനാണ് തീരുമാനം. പ്രവേശന നടപടികള്‍ക്കായി കോഴിക്കോട് മലബാര്‍ ക്രിസ്റ്റ്യന്‍ കോളജിലെത്തിയ അഞ്ജലിയെ, എസ്എഫഐയും, യൂണിയന്‍ ഭാരവാഹികളും ചേര്‍ന്ന് സ്വീകരിച്ചു.
കോളേജ് പ്രിൻസിപ്പലിനെ കണ്ടായിരുന്നു കോളേജിൽ പഠിക്കാനുള്ള ആഗ്രഹം അഞ്ജലി പ്രകടിപ്പിച്ചത്. കാലിക്കറ്റ് സർവകലാശാലയിലെ ഏത് കോളേജിൽ പഠിക്കാനുള്ള അനുമതിയും യൂണിവേഴ്‌സിറ്റി വിസി വാഗ്ദാനം ചെയ്തിരുന്നു. പ്രായം ഒരു പ്രശ്നമല്ല എന്നും പഠനം മാത്രം പ്രധാനം എന്നുമാണ് അധികൃതർ പറയുന്നത്. എല്ലാം പൂർത്തിയായി വന്നാൽ ഈ വർഷം തന്നെ അഞ്ജലി കോളേജ് പഠനം ആരംഭിക്കും. നാട്ടുകാരുടെ പരിഹാസവും ആക്ഷേപവും കാരണം അഞ്ജലി നാടു വിട്ടു പോകുമ്പോൾ വെറും പത്താം ക്ലാസ് വിദ്യാഭ്യാസം മാത്രമായിരുന്നു ഉണ്ടായിരുന്നത് .
