ദീപാവലി റിലീസ് ആയി തിയറ്ററുകളിൽ എത്തിയ സ്റ്റൈൽ മന്നൻ ചിത്രം ‘അണ്ണാത്തെ’ ബോക്സ് ഓഫീസ് തൂത്തുവാരി മുന്നേറുന്നു. ഒരു ഇടവേളയ്ക്ക് ശേഷം തിയറ്ററുകൾ ഇളക്കിമറിച്ച രജനികാന്ത് ചിത്രത്തിന് ബോക്സ് ഓഫീസ് കളക്ഷൻ റിപ്പോർട്ടുകൾ പുറത്തു വന്നിരിക്കുകയാണ്. സിരുത്തൈ ശിവയുടെ സംവിധാനത്തിൽ മാസും ആക്ഷനും ഡാൻസ് നമ്പറുകളുമായി എത്തിയ സിനിമയ്ക്ക് ആദ്യം കുറച്ച് നെഗറ്റീവ് റിവ്യൂകൾ ലഭിച്ചിരുന്നെങ്കിലും തിയറ്ററുകളിൽ അതൊന്നും ബാധിച്ചില്ല.
നവംബർ നാലിന് റിലീസ് ചെയ്ത ചിത്രം ലോകവ്യാപകമായി 225 കോടി കളക്ഷൻ നേടിയെന്നാണ് റിപ്പോർട്ടുകൾ. രജനി ആരാധകരെ തൃപ്തിപ്പെടുത്തുന്നതാണ് ചിത്രമെന്നാണ് കളക്ഷൻ റിപ്പോർട്ടുകൾ സൂചിപ്പിക്കുന്നത്. നയൻതാരയാണ് ചിത്രത്തിൽ നായിക. ദർബാറിന് ശേഷം നയൻതാര വീണ്ടും രജനിയുടെ നായികയായി എത്തിയ ചിത്രമാണ് അണ്ണാത്തെ.
മീന, കീർത്തി സുരേഷ്, സതീഷ്, സൂരി, പ്രകാശ് രാജ് തുടങ്ങിയ വൻ താരനിര തന്നെയാണ് അണ്ണാത്തെയിൽ അണിനിരക്കുന്നത്. സൺ പിക്ചേഴ്സ് ആണ് ചിത്രത്തിന്റെ നിർമാണം. ഒരു മാസ് കുടുംബചിത്രമാണ് അണ്ണാത്തെ. ചിത്രത്തിലെ ആദ്യഗാനം ആലപിച്ചത് എസ് പി ബാലസുബ്രഹ്മണ്യം ആയിരുന്നു. ആ ഗാനം വലിയ ഹിറ്റ് ആയിരുന്നു. ഡി ഇമ്മൻ ആണ് സംഗീതസംവിധാനം. ഗാനരചന നിർവഹിച്ചിരിക്കുന്നത് വിവേക ആണ്. ഛായാഗ്രാഹകൻ വെട്രി പളനിസാമിയാണ്.
