2008 ല് പുറത്തിറങ്ങിയ ട്വന്റി 20 എന്ന ചിത്രം മലയാളത്തിലെ ഒട്ടുമിക്ക സൂപ്പർതാരങ്ങളെയും ഒരുമിപ്പിക്കുന്ന ഒന്നായിരുന്നു. തങ്ങളുടെ സംഘടനയിലെ മുതിര്‍ന്ന അംഗങ്ങള്‍ക്കായുള്ള പെന്‍ഷന്‍ തുക കണ്ടെത്താനായി താരസംഘടനയായ ‘അമ്മ’യുടെ നേതൃത്വത്തിലാണ് അന്ന് ചിത്രമൊരുക്കിയത്. ഉദയകൃഷ്‍ണ-സിബി കെ തോമസിന്‍റെ തിരക്കഥയില്‍ ജോഷി സംവിധാനം ചെയ്ത ചിത്രം നിർമിച്ചത് ദിലീപ് ആയിരുന്നു. ഇപ്പോൾ ഇതാ വീണ്ടും ഇത്തരത്തിലുള്ള ഒരു സംരംഭം ആരംഭിക്കുകയാണ് അമ്മ സംഘടന. ധനസമാഹരണം തന്നെയാണ് ഇത്തവണയും ലക്ഷ്യം. കൊറോണ പകർച്ചവ്യാധി ഏറ്റവുമധികം ബാധിച്ച ഒരു മേഖലയാണ് സിനിമ മേഖല.
തീയേറ്ററുകൾ അടച്ചതോടെ ചില സിനിമകളുടെ ഷൂട്ടിംങ്ങുകൾ മാത്രമാണ് നടക്കുന്നത്. ഷൂട്ടിംഗ് അവസാനിച്ചതോടെ ജോലിയില്ലാതെ വീട്ടിലിരിക്കുന്ന അംഗങ്ങളെ സാമ്പത്തികമായി സഹായിക്കാൻ വേണ്ടിയാണ് ഈ സംരംഭം ആരംഭിക്കുന്നത്. ടി കെ രാജീവ് കുമാർ സംവിധാനം ചെയ്യും എന്നാണ് അറിയുവാൻ കഴിയുന്നത്. എന്നാൽ ഇക്കാര്യത്തിൽ അന്തിമ തീരുമാനം എടുത്തിട്ടില്ല. അടുത്തവർഷം അവസാനത്തോടെ ചിത്രീകരണം ആരംഭിക്കാനാണ് തീരുമാനം.
