മലയാളികൾ ഇരു കൈയ്യും നീട്ടി സ്വീകരിച്ച് വൻ വിജയമായി തീർന്ന ചിത്രമാണ് മോഹൻലാലിനെ നായകനാക്കി പൃഥ്വിരാജ് സുകുമാരൻ സംവിധാനം ചെയ്ത ലൂസിഫർ. ചിത്രത്തിന്റെ രണ്ടാം ഭാഗമായ എമ്പുരാന് വേണ്ടി കാത്തിരിക്കുകയാണ് ആരാധകർ. മാതൃഭൂമിയുമായുളള അഭിമുഖത്തിൽ ലൂസിഫറിനെ കുറിച്ചും സംവിധായകനായ പൃഥ്വിരാജിനെ കുറിച്ചും ആന്റണി പെരുമ്പാവൂർ പറഞ്ഞിരുന്നു. ഇത്രയും ആത്മാർഥതയുള്ള ഒരു സംവിധായകനെ താൻ കണ്ടിട്ടില്ലെന്നും ഊണിലും ഉറക്കത്തിലും സിനിമയെ കുറിച്ച് മാത്രമാണ് പൃഥ്വിരാജിന് ചിന്ത എന്നും ആന്റണി പെരുമ്പാവൂർ പറയുന്നു. രാവും പകലും സിനിമ എന്ന ചിന്ത മാത്രമാണ് പൃഥ്വിക്ക് ഉള്ളതെന്ന് സുപ്രിയയും പറയുന്നുണ്ട്.
എമ്പുരാൻ ചിത്രീകരിക്കുന്നതിന് വേണ്ടി കുറഞ്ഞത് അഞ്ച് സിനിമകളെങ്കിലും പൃഥ്വിരാജിന് വേണ്ടെന്ന് വയ്ക്കേണ്ടി വരും എന്നാണ് ആന്റണി പെരുമ്പാവൂർ പറയുന്നത്. ഇന്ത്യൻ സിനിമയിലെ ഹിറ്റ് മേക്കർ പട്ടികയിൽ ഉടൻതന്നെ പൃഥ്വി ഇടംപിടിക്കും എന്നും ലൂസിഫർ കണ്ട് രജനീകാന്തും ഷാരൂഖ് ഖാനും ഒക്കെ പൃഥ്വിയെ വിളിച്ചിരുന്നുവെന്നും അവർ കൊണ്ടു പോകുന്നതിനു മുൻപ് വേണ്ടവിധം താരത്തെ ഉപയോഗിക്കാൻ ഉള്ള തയ്യാറെടുപ്പിലാണ് താനെന്നും ആന്റണി പറയുന്നു. ഇപ്പോൾ ബ്ലെസി സംവിധാനം ചെയ്യുന്ന ആടുജീവിതം എന്ന ചിത്രത്തിനായുള്ള തയ്യാറെടുപ്പിലാണ് പൃഥ്വിരാജ്. ചിത്രത്തിലെ കഥാപാത്രത്തെ ഉൾക്കൊള്ളുന്നതിന്റെ ഭാഗമായി തന്റെ ശരീരഭാരം കുറച്ച് ഇപ്പോൾ കേരളത്തിൽ നിന്നും വിട്ടുനിൽക്കുകയാണ് താരം.
