മലയാളി പ്രേക്ഷകരുടെ പ്രിയനടി അനു സിതാര മമ്മൂട്ടിയോടൊപ്പം ഒരു മുഴുനീള റോളിൽ ആദ്യമായി അഭിനയിക്കുന്ന ചിത്രമാണ് ഒരു കുട്ടനാടൻ ബ്ലോഗ്. ജയസൂര്യയും അനു സിത്താരയും ഒന്നിച്ച ക്യാപ്റ്റനിൽ മമ്മൂട്ടി ഒരു ഗസ്റ്റ് റോളിൽ എത്തിയിരുന്നു. ഹേമ എന്ന കഥാപാത്രത്തെയാണ് തിരക്കഥാകൃത്ത് സേതു ആദ്യമായി സംവിധാനം ചെയ്യുന്ന ഈ ചിത്രത്തിൽ ആണ് സിതാര അവതരിപ്പിക്കുന്നത്. ഈ അടുത്ത് മമ്മൂട്ടി തന്നെ നായകനായ തെലുങ്ക് ചിത്രം യാത്രയുടെ ലൊക്കേഷനിൽ പോയപ്പോൾ ഉണ്ടായ അനുഭവം പങ്കുവെക്കുകയാണ് നടി. മുൻ മുഖ്യമന്ത്രി വൈ എസ് രാജശേഖര റെഡ്ഢിയുടെ ജീവിതം ആസ്പദമാക്കി ഒരുക്കുന്ന ചിത്രത്തിൽ വൈ എസ് ആറായിട്ടാണ് മമ്മൂട്ടി എത്തുന്നത്. ഒരു തെലുങ്ക് ചിത്രത്തിന്റെ കഥ കേൾക്കാനായിട്ടാണ് അനു സിതാര ഹൈദരാബാദിലെത്തിയത്. അപ്പോഴാണ് മമ്മൂട്ടിയെ കാണാൻ യാത്രയുടെ ലൊക്കേഷനിൽ ചെന്നത്. അവിടെ ചെന്നപ്പോൾ ചിത്രത്തിനായി തെലുങ്ക് ഡയലോഗുകൾ പഠിക്കുകയായിരുന്നു മമ്മൂട്ടി.
“ധാരാളം പേജുകളുള്ള ഡയലോഗ് ആയിരുന്നു. ഓരോ വാക്കിന്റെയും അർത്ഥം മനസിലാക്കിത്തന്നെയാണ് മമ്മൂക്ക അത് പഠിച്ചെടുത്തു കൊണ്ടിരുന്നത്. കഥാപാത്രത്തെ എത്രയും പൂർണമാക്കാമോ അതിനായി അദ്ദേഹം എടുക്കുന്ന ഡെഡിക്കേഷൻ അത്ഭുതപ്പെടുത്തുന്നത് തന്നെയാണ്.” തെലുങ്ക് ചിത്രത്തിനായുള്ള കഥ കേട്ടെങ്കിലും അത് ചെയ്യുന്നില്ലായെന്ന് നടി വ്യക്തമാക്കിയിട്ടുണ്ട്. ഒരു കുട്ടനാടൻ ബ്ലോഗ് ഈ ഓണത്തിന് തീയറ്ററുകളിൽ എത്തുന്നതാണ്.
