ബ്ലോക്ക്ബസ്റ്ററായി തീർന്ന കുഞ്ചാക്കോ ബോബൻ ചിത്രം അഞ്ചാം പാതിരാക്ക് ശേഷം ആഷിഖ് ഉസ്മാൻ പ്രൊഡക്ഷൻസിന്റെ ബാനറിൽ ആഷിഖ് ഉസ്മാൻ നിർമിക്കുന്ന പുതിയ ചിത്രത്തിന്റെ ഷൂട്ടിങ്ങ് നാളെ മുതൽ ആരംഭിക്കുന്നു. അനുരാഗ കരിക്കിൻവെള്ളം, ഉണ്ട എന്നീ ചിത്രങ്ങൾ സംവിധാനം നിർവഹിച്ച ഖാലിദ് റഹ്മാൻ തിരക്കഥയും സംവിധാനവും നിർവഹിക്കുന്ന ചിത്രത്തിൽ ഷൈൻ ടോം ചാക്കോയാണ് നായകൻ. രജീഷ വിജയൻ, വീണ നന്ദകുമാർ എന്നിവർ നായികമാരായി എത്തുന്ന ഈ ചിത്രത്തിന്റെ പേര് ഇനിയും പുറത്തു വിട്ടിട്ടില്ല. ആഷിഖ് ഉസ്മാൻ പ്രൊഡക്ഷൻസിന്റെ പത്താമത്തെ ചിത്രമായ ഇതിൽ സുധി കോപ്പ, ഗോകുലൻ, ജോണി ആന്റണി, തുടങ്ങിയവരും അഭിനയിക്കുന്നുണ്ട്.
കോവിഡ് കാലത്തെ എല്ലാ സർക്കാർ മാനദണ്ഡങ്ങളും പാലിച്ചുകൊണ്ടും, ആരോഗ്യസംബന്ധിയായ, സാധ്യമായ എല്ലാ മുൻകരുതലുകൾ എടുത്തുകൊണ്ടുമാണ് ചിത്രീകരണം ആരംഭിക്കുന്നതെന്ന് അണിയറപ്രവർത്തകർ വ്യക്തമാക്കിയിട്ടുണ്ട്. ജിംഷി ഖാലിദാണ് ഛായാഗ്രഹണം. യാക്സൺ ഗാരി പെരേരയും നേഹ എസ് നായരും സംഗീത സംവിധാനം നിർവഹിക്കുന്ന ചിത്രത്തിന്റെ എഡിറ്റിംഗ് നൗഫൽ അബ്ദുള്ള നിർവഹിക്കുന്നു. ആർട്ട് ഡയറക്ടർ – ഗോകുൽ ദാസ്, പ്രൊഡക്ഷൻ ഡിസൈൻ – ബാദുഷ, പ്രൊഡക്ഷൻ കൺട്രോളർ – സുധർമൻ വള്ളിക്കുന്ന്, മേക്കപ്പ് – റോനെക്സ് സേവ്യർ, കോസ്റ്റ്യൂംസ് – മെൽവിൻ, സൗണ്ട് ഡിസൈൻ – സപ്താ സൗണ്ട്സ്.
