കഴിഞ്ഞ ദിവസം ആയിരുന്നു പാമ്പ് പിടിക്കുന്നതിനിടയിൽ വാവ സുരേഷിന് മൂർഖൻ പാമ്പിന്റെ കടിയേറ്റത്. മെഡിക്കൽ കോളേജിൽ ചികിത്സയിൽ കഴിയുന്ന വാവ സുരേഷിന്റെ ആരോഗ്യനില തൃപ്തികരമെന്നാണ് റിപ്പോർട്ടുകൾ. വാവ സുരേഷ് ചികിത്സയിൽ കഴിയുന്നതിനിടെ അദ്ദേഹത്തിന്റെ പാമ്പ് പിടുത്തത്തിന്റെ രീതിക്കെതിരെ സോഷ്യൽമീഡിയയിൽ വിമർശനം ഉയരുകയാണ്. തികച്ചും അശാസ്ത്രീയമാണ് വാവ സുരേഷ് പാമ്പ് പിടിക്കുന്നതെന്നാണ് ആരോപണം. പാമ്പിന് തന്നെ ഉപദ്രവകരമാകുന്ന തരത്തിലാണ് വാവ സുരേഷ് പാമ്പിനെ പിടിക്കുന്നതെന്നും ചിലർ വാദിക്കുന്നു. വാവ സുരേഷിന്റെ പാമ്പ് പിടുത്തത്തിന് എതിരെ അശ്വന്ത് കോക് എന്ന വ്ലോഗറും രംഗത്തെത്തി.
വാവ സുരേഷിന് പാമ്പ് പിടിക്കുമ്പോൾ ലഭിക്കുന്നത് ഒരു തരത്തിലുള്ള പരമാനന്ദം ആണെന്നും പാമ്പിനെ പിടിച്ച് കഴിഞ്ഞ് പാമ്പിനെ കൊണ്ട് അഭ്യാസപ്രകടനങ്ങൾ നടത്തുമ്പോൾ അത് ആളുകൾ കാണുമ്പോൾ ലഭിക്കുന്ന ആ പരമാനന്ദത്തിന് വേണ്ടിയാണ് വാവ സുരേഷ് പാമ്പിനെ പിടിക്കുന്നതെന്നും അശ്വന്ത് പറയുന്നു. അദ്ദേഹം ശാസ്ത്രീയമായ രീതിയിലല്ല പാമ്പ് പിടിക്കുന്നതെന്ന് കാലാകാലങ്ങളാണ് ആളുകൾ പറയുന്ന കാര്യമാണെന്നും അശ്വന്ത് ആരോപിക്കുന്നു.
പാമ്പിനെ പിടിച്ച് അതിനെയും കൊണ്ട് അഭ്യാസപ്രകടനങ്ങൾ നടത്തുമ്പോൾ കൂടി നിൽക്കുന്ന ആളുകൾ കൈയടിക്കുകയും പ്രോത്സാഹിപ്പിക്കുകയും ചെയ്യും. സർക്കസിലെ ഒരു കോമാളിക്ക് ലഭിക്കുന്ന ആനന്ദമാണ് അദ്ദേഹത്തിന് അപ്പോൾ ലഭിക്കുന്നത്. യാതൊരു തരത്തിലുമുള്ള മുൻകരുതലുകളും എടുക്കാതെയാണ് ഇദ്ദേഹം പാമ്പിനെ പിടിക്കുന്നതെന്നും ഇത്രയും അശാസ്ത്രീയമായുള്ള പാമ്പ് പിടുത്തം അധികാരപ്പെട്ടയാളുകൾ നിയന്ത്രിക്കണമെന്നും അശ്വന്ത് ആവശ്യപ്പെടുന്നു.
