ഐപിഎൽ മത്സരത്തിനിടെ ഗാലറിയിൽ ഷാരൂഖിനൊപ്പം കറുത്ത ടീഷർട്ട് ധരിച്ച് ഇരിക്കുന്ന തമിഴ് സംവിധായകൻ അറ്റ്‌ലിയെ നിറത്തിന്റെ പേരിൽ അധിക്ഷേപിച്ചവർക്ക് മറുപടിയുമായി അദ്ദേഹമിപ്പോൾ രംഗത്തെത്തിയിരിക്കുകയാണ്. കറുത്ത ടീഷർട്ട് ധരിച്ച് അറ്റ്‌ലി ഗ്യാലറിയിൽ ഷാരൂഖിനൊപ്പം ഇരിക്കുന്ന ചിത്രമാണ് സോഷ്യൽ മീഡിയയിൽ വൈറലായത്. ‘എടാ നിനക്ക് കറുത്ത വസ്ത്രം ഇടണമായിരുന്നോ? തിരഞ്ഞു കണ്ടുപിടിക്കേണ്ടി വരുന്നല്ലോ…’എന്ന ആക്ഷേപത്തിനാണ് അദ്ദേഹം മറുപടി നൽകിയത്.
ഇൗ മീം പോസ്റ്റ് ചെയ്തവർക്ക് അദ്ദേഹം ആദ്യം തന്നെ നന്ദി പറയുന്നുണ്ട്. ഹിന്ദി, ഇംഗ്ലിഷ് എന്നത് വെറും ഭാഷകൾ മാത്രമാണെന്നും അതൊരു അറിവല്ല എന്നും കറുപ്പും വെളുപ്പും എന്നു പറയുന്നത് വെറും നിറങ്ങൾ ആണെന്നും അദ്ദേഹം പറയുന്നു. തന്നെ ഇഷ്ടമില്ലാത്തവർ താൻ വളരെ കറുപ്പാണ് എന്നും തനിക്ക് ഇങ്ങനെ ഒരു ഭാര്യയെ ലഭിക്കേണ്ടത് അല്ലായിരുന്നു എന്നും പറയാറുണ്ടെന്നും തന്നെ ഏറ്റവും ഇഷ്ടമുള്ളത് തന്റെ ഹേറ്റേഴ്സിന് ആണെന്നും അദ്ദേഹം പറയുന്നു. തന്റെ ആരാധകർ തന്നെ പറ്റി മൂന്നോ നാലോ തവണ പറയുമ്പോൾ തന്നെ ഇഷ്ടമില്ലാത്തവർ തന്നെപ്പറ്റി നൂറിലധികം തവണ പറയുന്നുണ്ട് എന്ന് അദ്ദേഹം പറയുന്നു. അദ്ദേഹത്തിന്റെ വാക്കുകൾ വലിയ കയ്യടികളോടെയാണ് സദസ്സ് സ്വീകരിച്ചത്. വിജയ്ക്കൊപ്പം തന്റെ മൂന്നാമത്തെ ചിത്രമാണെന്നും മറ്റ് താരങ്ങൾക്കൊപ്പം സിനിമ ചെയ്യണമെന്ന് തനിക്ക് ആഗ്രഹമുണ്ടെന്നും അദ്ദേഹം പറയുന്നു. പക്ഷേ തിരക്കഥയെഴുതി സംവിധാനം ചെയ്യാൻ തീരുമാനിക്കുമ്പോൾ വിജയുടെ മുഖം മാത്രമാണ് തന്റെ മനസ്സിൽ വരുന്നതെന്നും അദ്ദേഹം കൂട്ടിച്ചേർത്തു.
