പിടികിട്ടാപ്പുള്ളി സുകുമാരക്കുറുപ്പിന്റെ കഥ പറയുന്ന സിനിമയായ കുറുപ് റിലീസ് ആയി. ആരാധകർ ഗംഭീരസ്വീകരണമാണ് കുറുപിന് നൽകിയത്. ശ്രീനാഥ് രാജേന്ദ്രൻ സംവിധാനം ചെയ്ത ചിത്രത്തിൽ ദുൽഖർ സൽമാൻ ആണ് കുറുപ് ആയി വേഷമിട്ടത്. രാവിലെ തന്നെ കുറുപ് കാണാൻ ആരാധകർ തിയറ്ററുകളിലേക്ക് എത്തിയിരുന്നു. കോവിഡ് പ്രതിസന്ധിക്ക് ശേഷം തിയറ്ററുകളിൽ റിലീസ് ചെയ്യുന്ന ആദ്യ ബിഗ് ബജറ്റ് ചിത്രമാണ് കുറുപ്. ആർപ്പുവിളിയോടെയാണ് ആരാധകർ ദുൽഖറിന്റെ ‘കുറുപി’നെ സ്വീകരിച്ചത്. കേരളത്തിൽ മാത്രം 450 തിയറ്ററുകളിൽ റിലീസ് ചെയ്ത കുറുപ് ലോകവ്യാപകമായി 1500 തിയറ്ററുകളിലാണ് റിലീസ് ചെയ്തത്. ബുക്കിങ് ആരംഭിച്ച ആദ്യ ദിവസങ്ങളിൽ തന്നെ കുറുപിന്റെ മിക്ക ഷോകളും ഹൗസ്ഫുൾ ആയിരുന്നു. തിയറ്ററുകളിൽ കോവിഡ് മാനദണ്ഡം പാലിച്ച് അമ്പത് ശതമാനം ആളുകൾക്ക് മാത്രമേ പ്രവേശനം അനുവദിക്കുന്നുള്ളൂ.
സിനിമ കണ്ടിറങ്ങിയ പ്രേക്ഷകർ സിനിമയ്ക്ക് അതിഗംഭീരമാണമെന്ന അഭിപ്രായമാണ് പ്രകടിപ്പിച്ചത്. ചിത്രത്തിൽ ദുൽഖറിന്റെ ലുക്കും പെർഫോമൻസും ഗംഭീരമായി എന്ന് പറഞ്ഞ പ്രേക്ഷകർ ഷൈൻ ടോം ചാക്കോയുടെ അഭിനയത്തെയും സുഷിൻ ശ്യാമിന്റെ സംഗീതത്തെയും എടുത്ത് പറഞ്ഞ് പ്രശംസിച്ചു. ‘ദുൽഖറിന്റെ പെർഫോമൻസ് അടിപൊളിയാണ്. യാതൊരു വിധ ഗ്ലോറിഫിക്കേഷനും ഇല്ലാത്ത പടമാണ്. സിംപിൾ ആയിട്ട് പറയുകയാണെങ്കിൽ സാധാരണയിൽ സാധാരണമായ ഒരു പടമാണ്. സുഷിൻ ശ്യാമിന്റെ ബി ജി എം ആണ് ചിത്രത്തിന്റെ ഒരു ടോട്ടൽ ഔട്ട് തരുന്നത്’- കുറുപ് കണ്ടിറങ്ങിയ ഒരു പ്രേക്ഷകൻ തന്റെ അഭിപ്രായം വ്യക്തമാക്കിയത് ഇങ്ങനെ. ‘ഫസ്റ്റ് ഹാഫിനേക്കാളും സെക്കൻഡ് ഹാഫാണ് അടിപൊളി ആയി തോന്നിയത്. ദുൽഖർ നല്ല കലക്കൻ ലുക്കിൽ ആയിരുന്നു. കുടുംബത്തോടെ എല്ലാവരും വന്ന് കാണണം.’, ‘അടിപൊളി പടം. ഒന്നും പറയാനില്ല. സെക്കൻഡ് ഹാഫ് തകർത്തു. ഒടിടി ആയിരുന്നെങ്കിൽ ചടച്ചു പോയേനെ. തിയറ്റർ എക്സ്പീരിയൻസ് അതുപോലെ അടിപൊളി’. ‘ദുൽഖർ, ഷൈൻ ടോം ചാക്കോ രണ്ടാളും സൂപ്പറാ.’ – ഇങ്ങനെ പോകുന്നു പടം കണ്ടിറങ്ങിയ പ്രേക്ഷകരുടെ അഭിപ്രായങ്ങൾ.
പിടികിട്ടാപ്പുള്ളി സുകുമാരക്കുറുപ്പിന്റെ ജീവിതത്തെ ആസ്പദമാക്കിയുള്ള സിനിമയാണ് ശ്രീനാഥ് രാജേന്ദ്രൻ സംവിധാനം ചെയ്ത കുറുപ്. ‘ഇലയ്ക്കോ മുള്ളിനോ വീശിയ കാറ്റിനോ കേടില്ലാതെ പടം അവസാനിപ്പിച്ചിട്ടുണ്ട്’ – എന്നായിരുന്നു ഒരു പ്രേക്ഷകൻ ചിത്രത്തിന് നൽകിയ കമന്റ്. തന്റെ വൻതുക വരുന്ന ഇൻഷുറൻസ് തുക തട്ടിയെടുക്കാൻ ഒരാളെ കൊന്ന് അയാൾ താനാണെന്ന് വരുത്തി തീർക്കാൻ ആയിരുന്നു സുകുമാര കുറുപ്പ് ശ്രമിച്ചത്. ജിതിൻ കെ ജോസ് കഥ ഒരുക്കിയിരിക്കുന്ന ചിത്രത്തിന്റെ തിരക്കഥയും സംഭാഷണവും ഒരുക്കിയിരിക്കുന്നത് ഡാനിയേൽ സായൂജ് നായരും കെ എസ് അരവിന്ദും ചേർന്നാണ്. നിമിഷ് രവി – ഛായാഗ്രഹണം, സുഷിൻ ശ്യാം – സംഗീത സംവിധാനം, ക്രിയേറ്റീവ് ഡയറക്ടർ – വിനി വിശ്വ ലാൽ. പ്രൊഡക്ഷൻ ഡിസൈനർ – ബംഗ്ലാൻ, എഡിറ്റിംഗ് – വിവേക് ഹർഷൻ. ശോഭിത ധുലിപാലയാണ് ചിത്രത്തിലെ നായിക. ഇന്ദ്രജിത് സുകുമാരൻ, സണ്ണി വെയ്ൻ, ഷൈൻ ടോം ചാക്കോ, വിജയരാഘവൻ, പി ബാലചന്ദ്രൻ, സുരഭി ലക്ഷ്മി, ശിവജിത് പദ്മനാഭൻ തുടങ്ങിയവരും ചിത്രത്തിൽ അഭിനയിക്കുന്നുണ്ട്. ചീഫ് അസ്സോസിയേറ്റ് ഡയറക്ടർ – പ്രവീൺ ചന്ദ്രൻ, സൗണ്ട് ഡിസൈൻ – വിഘ്‌നേഷ് കിഷൻ രജീഷ്, മേക്കപ്പ് – റോനെക്സ് സേവ്യർ, കോസ്റ്റ്യൂംസ് – പ്രവീൺ വർമ്മ, പ്രൊഡക്ഷൻ കൺട്രോളർ – ദീപക് പരമേശ്വരൻ, പി ആർ ഒ – ആതിര ദിൽജിത്, സ്റ്റിൽസ് – ഷുഹൈബ് SBK, പോസ്റ്റർ ഡിസൈൻ – ആനന്ദ് രാജേന്ദ്രൻ & എസ്‌തെറ്റിക്‌ കുഞ്ഞമ്മ.
