നടി ആക്രമിക്കപ്പെട്ട കേസുമായി ബന്ധപ്പെട്ട് നടൻ ദിലീപ് ആവശ്യമില്ലാതെ ക്രൂശിക്കപ്പെടുകയാണെന്ന് നടൻ ലാൽ, നടൻ ലാലിന്റെ പേരിലുള്ള ഒരു ഓഡിയോ സന്ദേശം ഇപ്പോൾ സോഷ്യൽ മീഡിയയിൽ വൈറലായിരിക്കുകയാണ്. അതിൽ, ഇക്കാര്യത്തിൽ ദിലീപ് ഒന്നും ഒരു ശതമാനം പോലും പങ്കാളിയാണെന്ന് താൻ വിശ്വസിക്കുന്നില്ലെന്നും ലാൽ വ്യക്തമാക്കുന്നു. ദിലീപിനെയൊക്കെ കൃത്യമായി അറിയാവുന്നതാണെന്നും
ദിലീപ് ഒരു കാര്യം ചെയ്യണമെങ്കിൽ ഇത്രയും വൃത്തികെട്ട ഹീനമായ ഒരു രീതിയിലേക്ക് പോകില്ലെന്ന് ചിന്തിക്കാൻ സാമാന്യബുദ്ധി മാത്രം മതിയെന്നും ലാൽ വ്യക്തമാക്കുന്നു.
‘ദിലീപുമായിട്ട് എത്രയോ കാലങ്ങളായിട്ട് നമുക്ക് പരിചയമുള്ളതാണ്. ദിലീപ് ആവശ്യമില്ലാതെ ക്രൂശിക്കപ്പെടുന്നത് കാണുമ്പോൾ നമുക്ക് സങ്കടമുണ്ട്. അത് തീർച്ചയായിട്ടും സങ്കടമുള്ള കാര്യം തന്നെയാണ്. കാരണം, ദിലീപ് ഒന്നും ഇക്കാര്യത്തിന് അകത്ത് ഒരു ശതമാനം പോലും പാർട് ആണെന്ന് ഞാൻ വിശ്വസിക്കുന്നില്ല. വിശ്വസിക്കുന്നില്ലാന്ന് മാത്രമല്ല അല്ലായെന്ന് തീർത്തും ഞാൻ വിശ്വസിക്കുന്നുണ്ട്. കാരണം ദിലീപിനെയൊക്കെ നമുക്ക് കൃത്യമായിട്ട് അറിയാവുന്നതാണ്. ദിലീപ് ഒരു കാര്യം ചെയ്യണമെങ്കിൽ ഇത്രയും വൃത്തികെട്ട ഹീനമായ ഒരു രീതിയിലേക്ക് പോകില്ലെന്ന് ചിന്തിക്കാൻ സാമാന്യബുദ്ധി മാത്രം മതി. അയാളെ വെറുതെ ഇട്ടിട്ട്, ഇതൊക്കെ സെലിബ്രിറ്റീസ് ആയി പോയതു കൊണ്ട്. അസൂയ ഉണ്ട്, ദിലീപിന്റെ വളർച്ചയിൽ അസൂയ ഉണ്ട്, സിനിമയിൽ തിരക്കായിട്ട് ഇരിക്കുന്ന എല്ലാവരുടെ നേരെയും അസൂയ ഉണ്ട്. അസൂയയും കുശുമ്പും കാര്യങ്ങളുമൊക്കെ. ഒരു സിനിമ വൻ വിജയമാണെന്ന് കേട്ട് കഴിഞ്ഞാൽ മറ്റ് സിനിമാക്കാരുടെ ഉള്ളിൽ ഒരു ഡൾനെസ് വരും. അത് നല്ല പടമാണെന്ന് അവര് അംഗീകരിക്കുക ഒക്കെ ചെയ്യും. പക്ഷേ, മനുഷ്യരാണ്. അപ്പോൾ ഒരാളുടെ വളർച്ച കാണുമ്പോൾ അസൂയയും കാര്യങ്ങളുമൊക്കെ ഉണ്ടാകും. ആ ഒരു അംശമാണ് ഇപ്പോൾ എടുത്തിട്ട് എല്ലാവരും ദിലീപിന് നേരെയും. ദിലീപിന് നേരെ മാത്രമല്ല, സിനിമ ഇൻഡസ്ട്രിയിലുള്ള പലരും ഇതിന് പിറകിലുണ്ട് എന്ന് കേൾക്കുമ്പോൾ സങ്കടമുണ്ട്, ശരിക്കും.
അതേസമയം, നടി ആക്രമിക്കപ്പെട്ട കേസുമായി ബന്ധപ്പെട്ട് ഹൈക്കോടതി ഉത്തരവ് പ്രകാരം നടൻ ദിലീപിന്റെ ഫോണുകൾ കോടതിക്ക് കൈമാറുമെന്ന് അദ്ദേഹത്തിന്റെ അഭിഭാഷകൻ അറിയിച്ചു. പരിശോധനയ്ക്ക് അയച്ചത് രണ്ടു ഫോണുകൾ മാത്രമാണ്. കോടതി ആവശ്യപ്പെട്ടതു പോലെ ആറു ഫോണുകളും തിങ്കളാഴ്ച മുദ്രവെച്ച കവറിൽ കോടതിയിൽ ഹാജരാക്കുമെന്നും അഭിഭാഷകൻ വ്യക്തമാക്കി.
