താനൊരു നല്ല നടൻ മാത്രമല്ല നല്ല ഗായകൻ കൂടിയാണെന്ന് തെളിയിച്ചിരിക്കുകയാണ് നടൻ സിജു വിത്സൺ. സൈജു കുറുപ്പ് നായകനായി എത്തുന്ന ‘ഉപചാരപൂർവം ഗുണ്ടജയൻ’ എന്ന സിനിമയിലെ ഏറ്റവും പുതിയ ഗാനം പുറത്തിറങ്ങി. സിജു വിത്സൺ ആലപിച്ച ‘അവളെ അവളെ ഞാനെൻ’ എന്ന ഗാനമാണ് ഇന്ന് റിലീസ് ചെയ്തത്. ഇതിനോടകം തന്നെ ഇതിലെ രണ്ടു ഗാനങ്ങൾ പുറത്തു വരികയും സൂപ്പർ ഹിറ്റ് ആകുകയും ചെയ്തിരുന്നു. അതിലൊന്ന് ശബരീഷ് വർമ്മ ഈണം നൽകി ആലപിച്ച ഗുണ്ട ഗുണ്ട ഗുണ്ട ജയൻ എന്ന ഗാനം ആയിരുന്നു എങ്കിൽ മറ്റൊന്ന് ബിജിപാൽ ഈണം നൽകി ദയ ബിജിപാൽ ആലപിച്ച ചില്ലുമണി കായലിന്റെ എന്ന ഗാനം ആണ്.
ചിത്രത്തിലെ മൂന്നാമത്തെ ഗാനം ആലപിച്ചിരിക്കുന്നത് നടനായ സിജു വിൽസൺ ആണ്. ചിത്രത്തിലെ ഒരു പ്രധാനകഥാപാത്രത്തെ അവതരിപ്പിക്കുന്ന സിജു വിൽസൺ അതിമനോഹരമായി തന്നെ ഈ ഗാനം ആലപിച്ചിട്ടുണ്ട്. ഏതായാലും ഈ പാട്ടോടെ മലയാള സിനിമയിലെ പാട്ടു പാടുന്ന മുൻനിര അഭിനേതാക്കളുടെ നിരയിലേക്ക് ധൈര്യമായി സിജു വിത്സനെയും നമ്മുക്ക് ചേർത്ത് വെക്കാം എന്ന് ഉപചാരപൂർവം ഗുണ്ട ജയനിലെ ഈ ഗാനം നമ്മുക്ക് കാണിച്ചു തരുന്നു. ‘അവളെ അവളെ ഞാനെൻ കനവിൽ കണ്ടാളെ’ എന്ന വരികളോടെ തുടങ്ങുന്ന ഈ ഗാനത്തിനും ഈണം പകർന്നത് ബിജിപാൽ ആണ്.
കുറുപ്പിന് ശേഷം ദുൽഖർ സൽമാൻ നിർമ്മിച്ചതാണ് ‘ഉപചാരപൂർവം ഗുണ്ടജയൻ’ എന്ന കോമഡി ചിത്രം. കഥ രചിച്ചു സംവിധാനം ചെയ്തത് അരുൺ വൈഗ ആണ്. രാജേഷ് വർമ്മയാണ് തിരക്കഥ. സൈജു കുറുപ്പ്, സിജു വിൽസൺ, ശബരീഷ് വർമ്മ എന്നിവരെ കൂടാതെ ജോണി ആന്റണി, സാബുമോന്‍, സുധീര്‍ കരമന, ജാഫര്‍ ഇടുക്കി, ബിജു സോപാനം, വിജിലേഷ്, ബൈജു എഴുപുന്ന, തട്ടിം മുട്ടിം ഫെയിം സാഗര്‍ സൂര്യ, വൃന്ദ മേനോന്‍, നയന, പാര്‍വതി എന്നിവരും അഭിനയിച്ചിട്ടുണ്ട്. എഡിറ്റിംഗ് – കിരൺ ദാസ്, ഛായാഗ്രഹണം – എൽദോ ഐസക്. വേഫെയര്‍ ഫിലിംസിന്റെ ബാനറില്‍ ദുല്‍ഖര്‍ സല്‍മാനും മൈ ഡ്രീംസ് എന്റര്‍ടൈന്‍മെന്റിന്റെ ബാനറില്‍ സെബാബ് ആനിക്കാടും ചേർന്ന് നിർമ്മിച്ച ചിത്രം ഫെബ്രുവരി ഇരുപത്തിയഞ്ചിന് റിലീസ് ചെയ്യും. അഡ്വാൻസ് ബുക്കിംഗ് കേരളത്തിൽ ആരംഭിച്ചു കഴിഞ്ഞു.
