ചിരിയുടെ പൂരവുമായി ജാൻ എ മൻ സിനിമ നവംബർ 19ന് തിയറ്ററുകളിലേക്ക് എത്തുകയാണ്. ഹാസ്യത്തിന് പ്രാധാന്യം നൽകി ഒരുക്കിയിരിക്കുന്ന ചിത്രം ഒരു ഇടവേളക്ക് ശേഷം തിയറ്ററുകളെ പൊട്ടിച്ചിരിപ്പിക്കുമെന്ന് ഉറപ്പ്. കോമഡിയും ഇമോഷനും ചേർത്തൊരുക്കിയിരിക്കുന്ന ചിത്രത്തിൽ മലയാളത്തിലെ യുവ താരനിരയാണ് അണിനിരക്കുന്നത്. ബേസിൽ ജോസഫ് നായകനായി എത്തുന്ന ചിത്രം സംവിധാനം ചെയ്തിരിക്കുന്നത് നടൻ ഗണപതിയുടെ സഹോദരൻ ചിദംബരം ആണ്. ചിദംബരവും ഗണപതിയും സപ്നേഷും ചേർന്നാണ് തിരക്കഥ. അതേസമയം, ജാൻ എ മൻ ഒടിടി റിലീസ് ലക്ഷ്യം വെച്ച് ചെയ്ത സിനിമയാണെന്നും എന്നാൽ പിന്നീട് തിയറ്ററിൽ റിലീസ് ചെയ്യാൻ തീരുമാനിക്കുകയായിരുന്നെന്നും സംവിധായകനായ ചിദംബരവും നായകനായ ബേസിലും പറഞ്ഞു. ചിത്രത്തിന്റെ പ്രിവ്യൂ ഷോയ്ക്ക് ശേഷം മാധ്യമങ്ങളോട് സംസാരിക്കവെയാണ് ഇക്കാര്യം അറിയിച്ചത്.
കഥ പറയുമ്പോൾ തന്നെ ഒരു രസമുണ്ടായിരുന്നു. മൊത്തത്തിലുള്ള എല്ലാ അഭിനേതാക്കളുടെയും കോൺട്രിബ്യൂഷൻ ആണ് സിനിമയെ ഇത്രയ്ക്ക് മനോഹരമാക്കിയത്. നല്ല ഹ്യൂമർസെൻസുള്ള ആളാണ് ചിദംബരം. ഒടിടി സിനിമയായി പ്ലാൻ ചെയ്ത സിനിമയാണെന്നും പിന്നീട് അത് തിയറ്റർ റിലീസിലേക്ക് മാറുകയായിരുന്നുവെന്നും ബേസിൽ പറഞ്ഞു. ബേസിലിനെ കണ്ടു കൊണ്ടു തന്നെയാണ് കഥ എഴുതിയതെന്ന് ചിദംബരം വ്യക്തമാക്കി. ബേസിൽ ഇല്ലായിരുന്നെങ്കിൽ പണി പാളിയേനെ. ഒടിടി പ്ലാൻ ചെയ്ത സിനിമ ആയിരുന്നു. എന്നാൽ എഡിറ്റിംഗ് എല്ലാം കഴിഞ്ഞപ്പോൾ തിയറ്ററിൽ തന്നെ റിലീസ് ചെയ്യാൻ തീരുമാനിക്കുകയായിരുന്നെന്നും ചിദംബരം പറഞ്ഞു.
അർജുൻ അശോകൻ, ബാലു വർഗീസ്, ഗണപതി, ബേസിൽ ജോസഫ്, സിദ്ധാർഥ് മേനോൻ, അഭിരാം രാധാകൃഷ്ണൻ, റിയ സൈറ, ഗംഗ മീര, സജിൻ ഗോപു, ചെമ്പിൽ അശോകൻ എന്നിവരെ കൂടാതെ ധാരാളം പുതുമുഖങ്ങളും സിനിമയിലുണ്ട്. ഛായാഗ്രഹണം നിർവഹിച്ചിരിക്കുന്നത് വിഷ്ണു തണ്ടാശേരി ആണ്. സലാം കുഴിയിൽ, ജോൺ പി എബ്രഹാം എന്നിവരാണ് സഹനിർമ്മാതക്കൾ. സഹരചന സപ്നേഷ് വരച്ചൽ, ഗണപതി. സംഗീതം – ബിജിബാല്‍, എഡിറ്റര്‍ – കിരണ്‍ദാസ്, കോസ്റ്റ്യും മാസ്റ്റര്‍ – ഹംസം, കലാസംവിധാനം – വിനേഷ് ബംഗ്ലാന്‍, മേക്കപ്പ് – ആര്‍ജി വയനാടന്‍, സ്റ്റില്‍ – വിവി ചാര്‍ലി, പ്രൊഡക്ഷന്‍ കണ്‍ട്രോളര്‍ – പി കെ ജിനു, സൗണ്ട് മിക്‌സ് – എംആര്‍ രാജാകൃഷ്ണന്‍, സൗണ്ട് ഡിസൈന്‍ – വിക്കി, കിഷന്‍ (സപ്താ റെക്കോര്‍ഡ്‌സ്), വിഎഫ്എക്‌സ് – കൊക്കനട്ട് ബഞ്ച്, പി ആർ ഒ – ആതിര ദില്‍ജിത്ത്, ഓണ്‍ലൈന്‍ മാര്‍ക്കറ്റിങ് പി.ആര്‍ വൈശാഖ് സി വടക്കേവീട് എന്നിവരാണ്.
