സിനിമാപ്രേമികൾ ആവേശത്തോടെ കാത്തിരിക്കുന്ന മമ്മൂട്ടി ചിത്രം എത്താൻ ഇനി അഞ്ചു ദിവസങ്ങൾ മാത്രം. ബിഗ് ബി എന്ന ചിത്രത്തിനു ശേഷം മമ്മൂട്ടിയെ നായകനാക്കി അമൽ നീരദ് സംവിധാനം ചെയ്യുന്ന ചിത്രമായ ഭീഷ്മ പർവ്വം മാർച്ച് മൂന്നിന് റിലീസ് ചെയ്യും. ശനിയാഴ്ച ഉച്ചയ്ക്ക് 12 മണി മുതൽ റിസർവേഷൻ ആരംഭിക്കും. പതിനാലു വർഷത്തിനു ശേഷം മമ്മൂട്ടിയും അമൽ നീരദും ഒന്നിക്കുന്നു എന്നതിനാൽ പ്രഖ്യാപനസമയം മുതൽ വലിയ പ്രേക്ഷകശ്രദ്ധ നേടിയ ചിത്രമാണിത്.
ചിത്രത്തിലെ ‘പറുദീസ’ എന്ന ഗാനം വൈറലായിരുന്നു. പാട്ടുകൾക്ക് മാത്രമല്ല ടീസറിനും വൻ പ്രതികരണമായിരുന്നു ലഭിച്ചത്. ടീസർ ഇതുവരെ 53 ലക്ഷത്തിലേറെ പേർ കണ്ടപ്പോൾ ട്രയിലർ 36 ലക്ഷത്തിനു മുകളിൽ ആളുകളാണ് കണ്ടത്. പറുദീസ വീഡിയോ ഗാനം നാല് മില്യണിന് മുകളിൽ ആളുകൾ കണ്ടു. കഴിഞ്ഞദിവസം പാതിരാത്രി ഒരു മണിക്ക് ആയിരുന്നു ഭീഷ്മപർവ്വം സിനിമയുടെ ട്രലിയർ റിലീസ് ചെയ്തത്. വൻ വരവേൽപ്പ് ആയിരുന്നു ട്രയിലറിന് ലഭിച്ചത്.
അമൽ നീരദിന് ഒപ്പം ദേവദത്ത് ഷാജിയും ചേർന്നാണ് ചിത്രത്തിന്റെ രചന നിർവ്വഹിച്ചിരിക്കുന്നത്. ചിത്രത്തിൽ മൈക്കിൾ എന്ന കഥാപാത്രമായാണ് മമ്മൂട്ടി എത്തുന്നത്. ഭീഷ്പ പർവത്തിനേക്കാൾ മുമ്പേ മമ്മൂട്ടിയുടെ ‘ബിലാൽ’ ആയിരുന്നു ചർച്ച ആയതെങ്കിലും കോവിഡ് പശ്ചാത്തലത്തിൽ ‘ഭീഷ്മ പർവം’ പ്രഖ്യാപിക്കുകയായിരുന്നു. വൻ താരനിരയാണ് ഭീഷ്മ പർവത്തിൽ മമ്മൂട്ടിക്ക് ഒപ്പമുള്ളത്. തബു, സൗബിൻ ഷാഹിർ, ഷൈൻ ടോം ചാക്കോ, ഫർഹാൻ ഫാസിൽ, ശ്രീനാഥ് ഭാസി, ദിലീഷ് പോത്തൻ, അബു സലിം, ലെന, മാല പാർവതി, നദിയ മൊയ്തു, ഹരീഷ് പേരടി എന്നിരാണ് ചിത്രത്തിലെ മറ്റ് അഭിനേതാക്കൾ. ഛായാഗ്രഹണം – ആനന്ദ് സി ചന്ദ്രന്‍, സംഗീതം – സുഷിന്‍ ശ്യാം, എഡിറ്റിംഗ് – വിവേക് ഹര്‍ഷന്‍.
