ലോക ടെലിവിഷന്‍ ചരിത്രത്തിലെ ഏറ്റവും വലിയ റിയാലിറ്റി ഗെയിം ഷോ ബിഗ് ബോസിന്റെ രണ്ടാം പതിപ്പ് മോഹൻലാൽ അവതാരകനായി വീണ്ടും ആരംഭിച്ചിരിക്കുകയാണ്. ഏഷ്യാനെറ്റിലൂടെ പ്രക്ഷോപണം ചെയ്യുന്ന റിയാലിറ്റി ഷോ യില്‍ മത്സരാര്‍ഥികളായി ആരൊക്കെ എത്തുമെന്ന് കാത്തിരിക്കുകയായിരുന്നു ആരാധകര്‍. ഇന്നലെയാണ് പ്രോഗ്രാം ആരംഭിച്ചത്. പ്രേക്ഷകരുടെ കാത്തിരിപ്പുകള്‍ വെറുതേയാവില്ലെന്ന് വ്യക്തമാക്കി കൊണ്ടുള്ള താരങ്ങളാണ് ഇത്തവണ മത്സരിക്കാന്‍ എത്തിയിരിക്കുന്നത്. ആദ്യ മത്സരാര്‍ഥിയായി വിളിച്ചത് ഒരു മുത്തശിഗദ എന്ന സിനിമയിലൂടെ വെള്ളിത്തിരയിലെത്തിയ രജനി ചാണ്ടിയെ ആണ്.
നടിയും അവതാരകയുമായ എലീന പടിക്കലാണ് രണ്ടാമത് മത്സരാര്‍ഥിയായി ബിഗ് ബോസിലേക്ക് എത്തിയിരിക്കുന്നത്. അടിപൊളി ഡാൻസ് പെർഫോമൻസും ആയിട്ടാണ് താരം എത്തിയത്. ആര്‍ ജെ രഘു ആണ് മൂന്നാമതായി ബിഗ് ബോസിലേക്ക് എത്തുന്നത്. നേരത്തെ ആരാധകര്‍ കാത്തിരുന്നത് പോലെ നടിയും അവതാരകയുമായ ആര്യയാണ് നാലാമതായി ബിഗ് ബോസില്‍ മത്സരിക്കാന്‍ എത്തിയത്. പാട്ടിനൊപ്പം കലക്കന്‍ ഡാന്‍സ് പെര്‍ഫോമന്‍സ് കാഴ്ച വെച്ച് കൊണ്ടായിരുന്നു ആര്യയുടെ വരവ്. പാഷണം ഷാജി എന്ന പേരില്‍ അറിയപ്പെടുന്ന സാജു നവോദയ ആണ് അഞ്ചാമതായി എത്തിയത്. ആറാമതായി വീണ നായരും ഏഴാമതായി മഞ്ജു സുനിച്ചനും എത്തി. ഗായകനായി അറിയപ്പെട്ട പരീക്കുട്ടി പെരുമ്പാവൂരാണ് ബിഗ് ബോസിലെ മറ്റൊരു മത്സരാര്‍ഥി ആയി എത്തിയത്. ഹാസ്യ നടിയായ തെസ്‌നി ഖാനും സസ്യ ശാസ്ത്ര അധ്യാപകനായ ഡോ രജിത് കുമാറും എത്തി. നടൻ പ്രദീപ് ചന്ദ്രനും ടിക് ടോക് താരമായ ഫുക്രുവും മോഡലായ രേഷ്മ രാജനും സ്റ്റാർ സിംഗറിലൂടെ ശ്രദ്ധേയനായ സോമദാസും അസിസ്റ്റന്റ് സംവിധായകനായ സുജോ മാത്യൂവും എയർഹോസ്റ്റസായ അലക്സാൺഡ്രായും അവസാന മത്സരാർത്ഥിയായി സുരേഷ് കൃഷ്ണനും എത്തി.
