അബുദാബി ബിഗ് ടിക്കറ്റ് നറുക്കെടുപ്പില്‍ 30 കോടി രൂപ സമ്മാനമായി ലഭിച്ച ഭാഗ്യശാലിയായ ആ മലയാളിയെ കണ്ടെത്തി. ദോഹയില്‍ ലുലു ഗ്രൂപ്പിന്റെ ജീവനക്കാരനായ സനൂപ് സുനില്‍ ആണ് ആ ഭാഗ്യശാലി. ഇന്നലെ(ചൊവ്വ) നടന്ന ബിഗ് ടിക്കറ്റിന്റെ 230-ാം സീരീസ് നറുക്കെടുപ്പിലാണ് സനൂപ് സമ്മാനത്താനര്‍ഹനായത്. 15 ദശലക്ഷം ദിര്‍ഹമാണ് സമ്മാനത്തുക. ഇത് ഏകദേശം 30 കോടിയിലേറെ രൂപ വരും.
സനൂപ് ഉള്‍പ്പടെ ലുലുവിലെ 20 പേര്‍ ചേര്‍ന്ന് സനൂപിന്റെ പേരില്‍ എടുത്ത ലോട്ടറി ടിക്കറ്റിനാണു സമ്മാനം. 183947 നമ്പര്‍ ടിക്കറ്റാണ് എറണാകുളം സ്വദേശിയും സിനിമാ നടന്‍ ഹരിശ്രീ അശോകന്റെ മരുമകനും കൂടിയായ സനൂപ് ജൂലൈ 13ന് ഓണ്‍ലൈനിലൂടെ എടുത്തത്.
ടിക്കറ്റ് സംഘാടകന്‍ റിചാര്‍ഡ് സനൂപിന്റെ മൊബൈലിലേക്കു പല തവണ വിളിച്ചു. ആദ്യമൊന്നും ബന്ധപ്പെടാന്‍ സാധിച്ചിരുന്നില്ല. സംഘടകര്‍ക്കു സനൂപുമായി ബന്ധപ്പെടാന്‍ കഴിഞ്ഞത് ദീര്‍ഘ നേരത്തെ ശ്രമത്തിനൊടുവിലാണ്. ഇന്നലെ നടന്ന മറ്റു നറുക്കെടുപ്പുകളിലും രണ്ടു ഇന്ത്യക്കാര്‍ സമ്മാനാര്‍ഹരായി. മലയാളികൂടിയായ ജോണ്‍സണ്‍ കുഞ്ഞുകുഞ്ഞുവിന് 10 ലക്ഷം ദിര്‍ഹവും ഇന്ത്യക്കാരനായ റെനാള്‍ഡ് ഡാനിയേലിന് 1,00000 ദിര്‍ഹവുമാണ് സമ്മാനമായി ലഭിച്ചത്.
