ബോബി ചെമ്മണ്ണൂരിനെ അറിയാത്തവര്‍ ചുരുക്കമായിരിക്കും. ഇന്ന് സോഷ്യല്‍ മീഡിയയില്‍ നിറഞ്ഞു നില്‍ക്കുന്ന താരമാണ് വ്യവസായിയായ ബോബി ചെമ്മണ്ണൂര്‍. ട്രോളുകളിലും അഭിമുഖങ്ങളിലും സ്റ്റേജ് പ്രോഗ്രാമുകളിലുമെല്ലാം നിറഞ്ഞു നില്‍ക്കുന്ന ബോബിയെ ആരാധകര്‍ വിളിക്കുന്നത് ബോചെ എന്നാണ്. ഒമ്പതാം ക്ലാസില്‍ പഠിക്കുമ്പോള്‍ കാമുകിയെ കാണാന്‍ കാറില്‍ ബാംഗ്ലൂരില്‍ പോയ ബോചെയുടെ കുട്ടിക്കാലകഥകളൊക്കെ സോഷ്യല്‍ മീഡിയയില്‍ ട്രോളായി നിറഞ്ഞിരുന്നു. എന്നാല്‍ താന്‍ പറയുന്നതൊന്നും നൂറു ശതമാനം തള്ളല്ലെന്നും ഒരു പ്രായത്തില്‍ മറ്റാരും ചെയ്യാത്തത് താന്‍ ചെയ്യുമ്പോള്‍ കേള്‍ക്കുന്നവര്‍ക്ക് അത്ഭുതമായി തോന്നുമെന്ന് ബോബി പറയുന്നു. പറയുമ്പോള്‍ അല്‍പ്പം നര്‍മവും മസാലയും ചേര്‍ക്കുന്നതുകൊണ്ടാവാം തള്ളാണെന്ന് തോന്നുന്നത് എന്നാണ് ഇക്കാര്യത്തില്‍ ബോചെയുടെ വിശദീകരണം.
താന്‍ ഒന്നാം ക്ലാസില്‍ പഠിക്കുമ്പോള്‍ തന്നെ ഗേള്‍ഫ്രണ്ട്‌സ് ഉണ്ടായിരുന്നെന്നും ബോബി ചെമ്മണ്ണൂര്‍ പറയുന്നു. ”ബോയിങ് ബോയിങ് സിനിമയില്‍ ലാലേട്ടന്‍ നാലു പെണ്‍കുട്ടികളെ ഒരേസമയം പ്രേമിക്കുന്നതു കണ്ടാണ് ഞാനും പ്രണയിക്കാന്‍ പഠിച്ചത്. കുര്‍ബാനിയെന്ന ഹിന്ദി സിനിമയിലെ കളര്‍ഫുള്‍ ഡാന്‍സും ഡിസ്‌കോയും കണ്ട് കൊതിയായിട്ടാണ് തനിയെ കാറോടിച്ച് ബാംഗ്ലൂരില്‍ ചെന്ന് അവിടെയുള്ള കാമുകിയുമായി ക്ലബ്ബില്‍ പോയി ഡാന്‍സ് ചെയ്തത്.” ഒന്നും മറച്ചുവയ്ക്കാന്‍ ഇഷ്ടപ്പെടാത്ത ആളാണ് താനെന്നും എല്ലാം തുറന്നു പറയുമ്പോള്‍ മനസ്സിന് ഭാരമില്ലാതെ ഉറങ്ങാനാവുമെന്നും ബോചെ പറയുന്നു.
ഭാര്യയ്ക്ക് തന്റെ കുരുത്തക്കേടുകളൊന്നും സഹിക്കാന്‍ പറ്റില്ല. ഇടയ്ക്ക് നല്ല ചവിട്ടും വഴക്കും കിട്ടും. അവര്‍ക്കൊരു സമാധാനമാവട്ടെ എന്നു കരുതി ഞാനതൊക്കെയങ്ങു സഹിക്കും. മാര്‍ക്കറ്റിങ്ങും സോപ്പിടലുമൊക്കെ നമുക്കും അറിയാമല്ലോ. പ്രശ്‌നങ്ങളുണ്ടാകുമ്പോള്‍ മണിയടിച്ചു വളച്ചൊടിച്ചു കുപ്പിയിലാക്കുമെന്നാണ് ബോബി ചെമ്മണ്ണൂര്‍ പറയുന്നത്. സ്മിതയാണ് ബോബി ചെമ്മണ്ണൂരിന്റെ ഭാര്യ. ഈയിടെയാണ് ഇരുവരുടെയും ഏകമകള്‍ അന്നയുടെ വിവാഹം കഴിഞ്ഞത്. നടന്‍ സാം സിബിനാണ് അന്നയുടെ വിവാഹം കഴിച്ചത്.
