മോഹൻലാലിനെ നായകനാക്കി പൃഥ്വിരാജ് സുകുമാരൻ സംവിധാനം ചെയ്ത ചിത്രമായ ‘ബ്രോ ഡാഡി’ മികച്ച പ്രേക്ഷക അഭിപ്രായമാണ് സ്വന്തമാക്കിയത്. ജനുവരി 26ന് ആയിരുന്നു ചിത്രം ഡിസ്നി പ്ലസ് ഹോട്ട് സ്‌റ്റാറിൽ റിലീസ് ചെയ്തത്. ലൂസിഫറിന് ശേഷം പൃഥ്വിരാജിനെ നായകനാക്കി സംവിധാനം ചെയ്ത ചിത്രമെന്ന പ്രത്യേകതയും ബ്രോ ഡാഡിക്ക് ഉണ്ടായിരുന്നു. മികച്ച അഭിപ്രായം നേടി ചിത്രം മുന്നേറുകയാണ്.
ഇതിനിടയിലാണ് ബ്രോ ഡാഡി റീമേക്ക് ചെയ്യുകയാണെന്ന വാർത്ത എത്തുന്നത്. തെലുങ്കിലേക്ക് ആണ് ചിത്രം റീമേക്ക് ചെയ്യപ്പെടുന്നെന്ന വാർത്തകളാണ് ഇപ്പോൾ പുറത്തെത്തുന്നത്. വെങ്കടേഷ് മോഹൻലാലിന്റെ വേഷം കൈകാര്യം ചെയ്യുമ്പോൾ പൃഥ്വിരാജ് ചെയ്ത വേഷം റാണ കൈകാര്യം ചെയ്യുമെന്നാണ് റിപ്പോർട്ടുകൾ. ടൈംസ് ഓഫ് ഇന്ത്യയാണ് ഇക്കാര്യം റിപ്പോർട്ട് ചെയ്യുന്നത്. എന്നാൽ, റീമേക്കുമായി ബന്ധപ്പെട്ട് കൂടുതൽ വിശദീകരണങ്ങൾ ഒന്നും പുറത്തു വന്നിട്ടില്ല.
പൃഥ്വിരാജ് സംവിധാനം ചെയ്ത രണ്ടാമത്തെ ചിത്രം എന്നതിനേക്കാൾ പൃഥ്വിരാജും മോഹൻലാലും ഒരുമിച്ച് അഭിനയിച്ച ചിത്രമെന്ന നിലയിൽ ബ്രോ ഡാഡി ഏറെ ശ്രദ്ധിക്കപ്പെട്ടിരുന്നു. ഒട്ടേറെ നർമമുഹൂർത്തങ്ങളാൽ സമ്പന്നമായ ചിത്രം അച്ഛനും മകനും തമ്മിലുള്ള സുഹൃത് ബന്ധമാണ് വ്യക്തമാക്കുന്നത്. മീന, ലാലു അലക്സ്, കല്യാണി പ്രിയദർശൻ, കനിഹ, മല്ലിക സുകുമാരൻ, ജഗദീഷ് തുടങ്ങി നിരവധി താരങ്ങളാണ് ഈ ചിത്രത്തിന് പിന്നിൽ അണിനിരന്നത്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് ചിത്രം നിർമിച്ചത്.
