പുരാവസ്തു തട്ടിപ്പുകേസില്‍ അറസ്റ്റിലായ മോന്‍സണ്‍ മാവുങ്കലിന്റെ കൈവശം ബോളിവുഡ് താരം കരീന കപൂറിന്റെ പേരില്‍ രജിസ്റ്റര്‍ ചെയ്ത പോര്‍ഷെ കാറും. ഒരു വര്‍ഷം മുമ്പാണ് 2007 മോഡല്‍ പോര്‍ഷെ ബോക്സ്റ്റര്‍ കാര്‍ പൊലീസ് പിടികൂടിയത്. ഇപ്പോള്‍ ചേര്‍ത്തലയിലെ പൊലീസ് സ്‌റ്റേഷനിലാണ് വാഹനം. ശ്രീവത്സം ഗ്രൂപ്പും മോന്‍സണുമായുണ്ടായ നിയമതര്‍ക്കത്തെ തുടര്‍ന്ന് 20ഓളം ആഡംബര വാഹനങ്ങള്‍ മോന്‍സണില്‍ നിന്ന് പിടിച്ചെടുത്തിരുന്നു. കരീന കപൂറിന്റെ മുംബൈയിലെ വിലാസമാണ് കാര്‍ രജിസ്‌ട്രേഷന്‍ രേഖകളിലുള്ളത്. രജിസ്‌ട്രേഷന്‍ മാറ്റാതെ എങ്ങനെയാണ് മോന്‍സണ്‍ കാര്‍ കൈവശം സൂക്ഷിച്ചിരുന്നത് എങ്ങനെയാണെന്ന് വ്യക്തമല്ല. മോന്‍സന്റെ പക്കലുള്ള ആഡംബര വാഹനങ്ങള്‍ രൂപമാറ്റം വരുത്തിയവയാണെന്നാണ് പൊലീസിന്റെ കണ്ടെത്തല്‍. മിക്ക വാഹനങ്ങള്‍ക്കും മതിയായ രേഖകളില്ലെന്നും പറയുന്നു.
10 കോടി രൂപ തട്ടിയെടുത്തതായി കാണിച്ച് ആറുപേര്‍ ഡി.ജി.പിക്ക് നല്‍കിയ പരാതിയിലാണ് ക്രൈംബ്രാഞ്ച് സംഘം ഇയാളെ അറസ്റ്റ് ചെയ്തത്. 25 വര്‍ഷമായി ആന്റിക്, ഡയമണ്ട് ബിസിനസുകള്‍ ചെയ്തുവരുകയാണെന്നും ഇതില്‍നിന്ന് ലഭിച്ച 2,62,600 കോടി രൂപ ഇന്ത്യയിലേക്ക് കൊണ്ടുവന്നപ്പോള്‍ തുകയും ഇന്‍വോയ്‌സും തമ്മിലെ അന്തരം കാരണം കേന്ദ്രസര്‍ക്കാര്‍ ഏജന്‍സി തടഞ്ഞുവെച്ചെന്നുമാണ് ഇയാള്‍ പരാതിക്കാരെ വിശ്വസിപ്പിച്ചത്.
50ല്‍ അധികം പേര്‍ സന്തോഷിന് പണം നല്‍കിയെന്നാണ് സൂചന. 50,000 രൂപ മുതല്‍ 30 ലക്ഷം വരെ പലരും സന്തോഷിന് കടമായി നല്‍കിയിരുന്നു. മോന്‍സന്‍ മാവുങ്കലുമായി ബിസിനസ് ആരംഭിച്ചതോടെ 1 ലക്ഷം ഒരു രൂപ വരെയുള്ള കടങ്ങള്‍ തിരിച്ചു നല്‍കി. പണം നല്‍കിയവര്‍ക്ക് തുടക്കത്തില്‍ സന്തോഷ് നല്ല പലിശ നല്‍കിയിരുന്നു. പണം തിരികെ ലഭിക്കാതെ വന്നിട്ടും ഭൂരിപക്ഷം പേരും സന്തോഷിന് എതിരെ പൊലീസില്‍ പരാതി നല്‍കിയിട്ടില്ല എന്നതാണ് വിചിത്രം. ഏതാനും പേര്‍ കോടതിയെ സമീപിച്ച്ച് സന്തോഷിന്റെ 15 സെന്റ് വസ്തുവും വീടും പരാതിക്കാരുടെ പേരില്‍ ജപ്തി ചെയ്‌തെടുത്തു. മോന്‍സന്‍ മാവുങ്കലില്‍ പുരാവസ്തുവായി അവതരിപ്പിച്ചതില്‍ ഏറെയും സന്തോഷിന്റെ ശേഖരത്തിലുള്ളതെന്നു സൂചനയുണ്ട്.
