ആരാധകരുടെ കാത്തിരിപ്പിന് വിരാമമിട്ട് സിബിഐ 5 എത്തുന്നു. തിരക്കഥാകൃത്ത് എസ് എൻ സ്വാമി തിരി തെളിച്ച് സി ബി ഐ 5ന് തുടക്കമിട്ടു. അതേസമയം, സിനിമയുടെ പേര് ഇതുവരെ തീരുമാനിച്ചിട്ടില്ല. ഇന്ന് ചിത്രത്തിന്‍റെ പൂജയും സ്വിച്ചോണ്‍ കര്‍മ്മവും നടന്നു. അതേസമയം, ലിജോ ജോസ് പെല്ലിശ്ശേരിയുടെ ചിത്രത്തിന് ശേഷം മമ്മൂട്ടി സി ബി ഐ ചിത്രത്തിൽ ജോയിൻ ചെയ്യും. പൂജയുടെ ചിത്രങ്ങൾ മമ്മൂട്ടിയും പങ്കു വെച്ചിരുന്നു. ഡിസംബർ പകുതിയോടെ മമ്മൂട്ടി ചിത്രത്തിൽ ജോയിൻ ചെയ്യും. സേതുരാമയ്യരായി മമ്മൂട്ടി വീണ്ടും എത്തുമ്പോള്‍ പല മാറ്റങ്ങളും ചിത്രത്തിനുണ്ട്. മമ്മൂട്ടിക്കൊപ്പം വനിതാ അന്വേഷണ ഉദ്യോഗസ്ഥരാണ് ഇക്കുറി ഉണ്ടാവുകയെന്നാണ് റിപ്പോര്‍ട്ടുകള്‍.
എന്നാൽ, തന്റെ ഇതുവരെയുള്ള എഴുത്തിൽ ഏറ്റവും കൂടുതൽ സമയമെടുത്ത് പൂർത്തിയാക്കിയ സിനിമയാണ് സി ബി ഐ 5 എന്ന് തിരക്കഥാകൃത്ത് എസ് എൻ സ്വാമി നേരത്തെ തന്നെ വ്യക്തമാക്കിയിട്ടുണ്ട്. സി ബി ഐ 5ന്റെ ക്ലൈമാക്സിന് വേണ്ടിയിട്ടാണ് താൻ ഏറ്റവും കൂടുതൽ സമയമെടുത്തിട്ടുള്ളതെന്നും ഒരു കൺവെൻഷനൽ ക്ലൈമാക്സ് അല്ല ചിത്രത്തിന്റേതെന്നും സ്വാമി പറഞ്ഞിരുന്നു. പലരും പല തരത്തിലുള്ള പേരുകൾ പുതിയ സിനിമയുടേതായി പ്രചരിപ്പിക്കുന്നുണ്ടെന്നും സിനിമയുടെ പേര് ഔദ്യോഗികമായി അറിയിക്കുമെന്നും അദ്ദേഹം വ്യക്തമാക്കിയിരുന്നു. എല്ലാ തരത്തിലും ജനങ്ങൾക്ക് ഇഷ്ടപ്പെടുന്ന സിനിമ ആയിരിക്കും സി ബി ഐ 5 എന്നും സ്വാമി നേരത്തെ പറഞ്ഞിരുന്നു.
മമ്മൂട്ടി – കെ മധു- എസ് എൻ സ്വാമി കൂട്ടുകെട്ടിൽ 1988ലാണ് സിബിഐ സീരിസിലെ ആദ്യചിത്രമായ ഒരു സിബിഐ ഡയറികുറിപ്പ് പുറത്തിറങ്ങുന്നത്. പിന്നീട് ജാഗ്രത, സേതുരാമയ്യര്‍ സിബിഐ, നേരറിയാന്‍ സിബിഐ എന്നീ ചിത്രങ്ങളും പുറത്തെത്തി. ആശ ശരത്താണ് മമ്മൂട്ടിയുടെ നായികയായി എത്തുന്നത്.
