മഞ്ജു വാര്യർ, സണ്ണി വെയ്ൻ, അലൻസിയർ തുടങ്ങിയവർ കേന്ദ്രകഥാപാത്രങ്ങളെ അവതരിപ്പിച്ചിരിക്കുന്ന ചതുർമുഖം ഇന്ന് പ്രദർശനത്തിനെത്തിയിരിക്കുകയാണ്. ഗംഭീര പ്രതികരണമാണ് മലയാളത്തിലെ ആദ്യ ടെക്‌നോ ഹൊറർ ചിത്രമായ ചതുർമുഖത്തിന് ലഭിച്ചിരിക്കുന്നത്. രഞ്ജീത് കമല ശങ്കർ,സലീൽ വി എന്നിവർ ചേർന്നാണ് ചിത്രം സംവിധാനം ചെയ്‌തിരിക്കുന്നത്‌. ആസിഫ് അലി നായകനായ കോഹിനൂറിന്റെ തിരക്കഥ രചിച്ചത് ഇരുവരും ചേർന്നായിരുന്നു. മഞ്ജു വാര്യർ പ്രൊഡക്ഷൻസും ജിസ്ടോംസ് മൂവീസിന്റെ ബാനറിൽ ജിസ്സ് ടോംസ്സും ജസ്റ്റിൻ തോമസും ചേർന്ന് നിർമ്മിക്കുന്ന ചിത്രത്തിന്റെ തിരക്കഥ ഒരുക്കിയത് അഭയകുമാർ കെ, അനിൽ കുര്യൻ എന്നിവർ ചേർന്നാണ്. അഭിനന്ദ് രാമാനുജമാണ് ഛായാഗ്രഹണം. സംഗീതം, പശ്ചാത്തല സംഗീതം ഡോൺ വിൻസെന്റ്. ചിത്രത്തിന്റെ ട്രെയ്‌ലറും ‘മായകൊണ്ട്’ എന്ന ഗാനവും ഏറെ ശ്രദ്ധ പിടിച്ചു പറ്റിയിരുന്നു.
മമ്മൂക്ക നായകനായ ദി പ്രീസ്റ്റിലെ പ്രകടനം കൊണ്ട് ഏറെ കൈയ്യടി നേടിയ മഞ്ജു വാര്യർ ചതുർമുഖത്തിലൂടെ ആ കൈയ്യടികളുടെ അളവ് കൂട്ടിയിരിക്കുകയാണ്. 2021ൽ തുടർച്ചയായ രണ്ടാം വിജയത്തിലേക്കാണ് മഞ്ജു വാര്യർ എത്തിയിരിക്കുന്നത്. അനുഗ്രഹീതൻ ആന്റണി വിജയം കുറിച്ച് മുന്നേറുന്നതിനിടയിൽ സണ്ണി വെയ്‌നും വിജയം തുടർക്കഥയാക്കുവാനുള്ള ഒരുക്കത്തിലാണ്.
