കഴിഞ്ഞവർഷത്തെ പ്രളയകാലം വീണ്ടും ആവർത്തിക്കുമ്പോൾ അന്ന് സഹായവും പിന്തുണയുമായി കൂടെയുണ്ടായിരുന്ന മലയാള സിനിമാതാരങ്ങൾ ഇന്നും സജീവമാവുകയാണ്. ടൊവിനോ തോമസ്‌, ദുല്‍ഖര്‍ സല്‍മാന്‍, നിവിന്‍ പോളി, ജൂഡ്‌ ആന്റണി എന്നിവരാണ്‌ ഇപ്പോൾ സമൂഹമാധ്യമങ്ങളിലൂടെ പിന്തുണയുമായി എത്തിയിരിക്കുന്നത്. ‘താല്‍ക്കാലികമായി സുരക്ഷാകേന്ദ്രങ്ങളിലേക്ക് മാറുക. വൈദ്യസഹായം, ഭക്ഷണം ഉള്‍പ്പെടെയുള്ള സൗകര്യങ്ങള്‍ ലഭിക്കാന്‍ ഈ സാഹചര്യത്തില്‍ ഏറ്റവും എളുപ്പം ക്യാമ്ബുകളിലാണ്. ജീവനാണ് ഏറ്റവും പ്രധാനം! ‘ എന്ന് ടൊവിനോ കുറിച്ചു.
അതോടൊപ്പം രക്ഷാദൗത്യത്തില്‍ സര്‍ക്കാരിനൊപ്പം പങ്കാളിയാകാന്‍ എന്‍ജിഒയില്‍ അംഗമാകുന്നതിനുള്ള ലിങ്കും കണ്‍ട്രോള്‍ റൂമുകളുടെ നംബരുകളും അദ്ദേഹം ഷെയര്‍ ചെയ്തു. ക്യാമ്പുകളിലേക്ക് ആവശ്യമായ ഭക്ഷണങ്ങൾ എത്തിക്കാനുള്ള മുന്നറിയിപ്പുമായി ആണ് നിവിൻപോളി രംഗത്തെത്തിയത്. അതേസമയം ദുൽഖർ സൽമാൻ ആകട്ടെ വളർത്തു മൃഗങ്ങളെ കൂടി രക്ഷിക്കണമെന്ന അപേക്ഷയുമായി ആണ് സജീവമാകുന്നത്. മുഖ്യമന്ത്രിയുടെ ഓഫീസില്‍ നിന്നുള്ള മുന്നറിയിപ്പ്‌ സന്ദേശം ഷെയര്‍ചെയ്‌തും ഫോണ്‍ നംബരുകള്‍ നല്‍കിയും ആഷിക് അബുവും രംഗത്തിറങ്ങിയിട്ടുണ്ട്. കഴിഞ്ഞ വര്‍ഷത്തെ പ്രളയചിത്രമല്ല, ഈ വര്‍ഷത്തെ ചിത്രംതന്നെയാണ്‌ എന്നു പറഞ്ഞുകൊണ്ടാണ്‌ സംവിധായകന്‍ ജൂഡ്‌ ആന്റണി പോസ്റ്റ് കുറിച്ചത്. കഴിഞ്ഞ വർഷത്തെ രീതിയിൽ ഒരു പ്രളയം ആവർത്തിക്കാതിരിക്കട്ടെ എന്ന ആശംസയും അദ്ദേഹം നേരുന്നുണ്ട്.
