ലൂസിഫറിന് ശേഷം പൃഥ്വിരാജും മോഹന്‍ലാലും ഒന്നിച്ചെത്തിയ ചിത്രമാണ് ബ്രോ ഡാഡി. പൃഥ്വിരാജിന്റെ സംവിധാന സംരഭത്തിലെത്തിയ ചിത്രം ഏറെ പ്രതീക്ഷയോടെയാണ് പ്രേക്ഷകര്‍ നോക്കിക്കണ്ടത്. ചിലര്‍ മികച്ചതെന്നു പറഞ്ഞപ്പോള്‍ മറ്റു ചിലര്‍ ചിത്രത്തിനെതിരെ വിമര്‍ശനവും ഉന്നയിച്ചു. ഒ.ടി.ടി പ്ലാറ്റ്‌ഫോമായ ഹോട്ട്‌സ്റ്റാര്‍ വഴിയാണ് ചിത്രം റിലീസ് ചെയ്തത്.
ചിത്രത്തില്‍ കഥാപാത്രങ്ങളുടെ വസ്ത്രധാരണം ഏറെ ശ്രദ്ധനേടിയിരുന്നു. പ്രശംസയ്‌ക്കൊപ്പം ഇതിനെതിരെ വിമര്‍ശനവും ഉയര്‍ന്നു. അടുക്കളയില്‍ വരെ സാറ്റിന്‍ സാരി ഉപയോഗിച്ചതിനെതിരെയായിരുന്നു പ്രധാന വിമര്‍ശനം. ഇതിന്റെ പിന്നിലെ കാരണം പറയുകയാണ് ചിത്രത്തിലെ കോസ്റ്റ്യൂം ഡിസൈനര്‍ സുജിത്ത് സുധാകരന്‍.
പൃഥ്വിരാജിന്റെ നിര്‍ദേശപ്രകാരണാണ് അത്തരത്തിലൊരു തീരുമാനമെന്നാണ് സുജിത്ത് പറയുന്നത്. വീട്ടില്‍ നൈറ്റിവേണ്ടെന്ന് പൃഥ്വിരാജ് പറഞ്ഞിരുന്നു. ഈ സിനിമ വ്യത്യസ്തമായ തലത്തിലുള്ളതാണ്. ഒരുസ്വപ്നം പോലെ മനോഹരമായ ഫീലും ലുക്കും കിട്ടാനാണ് ശ്രമിച്ചതെന്നും സുജിത്ത് പറഞ്ഞു.
ചിത്രത്തില്‍ നടി മീന ഉപയോഗിച്ചത് സാറ്റിന്‍ സാരികളായിരുന്നു. ഒരാഴ്ച കൊണ്ട് ഇത്തരത്തില്‍ മുപ്പത് സാരികള്‍ വരെ തയ്യാറാക്കി. എല്ലാം ഹാന്‍ഡ് ഡൈ ചെയ്‌തെടുത്തതാണ്. ടൈ ആന്‍ഡ് ഡൈ, ഡിപ് ഡെ, ഓംബ്രെ പാറ്റേണുകളിലാണ് സാരികള്‍. ചിലതില്‍ സൂക്ഷ്മമായ അലങ്കാരത്തുന്നലുകളും ഉള്‍പ്പെടുത്തിയിട്ടുണ്ട്. ഐസി ബ്ലൂ, മിസ്റ്റി ഗ്രേ, കോറല്‍ കളര്‍ കോംബിനേഷനുകളും സാരികള്‍ക്കു വ്യത്യസ്ത നല്‍കിയിട്ടുണ്ട്. മീനയുടെയും കനിഹയുടെയും സാരികള്‍ ഈ രീതിയിലുള്ളതാണ്. കനിഹയുടേത് കോട്ടണ്‍ സാരിളായിരുന്നു. സാരികള്‍ക്ക് പ്രത്യേകമായ വ്യക്തിത്വം നല്‍കിയാണ് ബ്രോഡാഡിയില്‍ നടി മീനയുടെ കോസ്റ്റ്യൂംസ് ഡിസൈന്‍ ചെയ്തിരിക്കുന്നതെന്നും അദ്ദേഹം വ്യക്തമാക്കുന്നു.
