ട്രോൾ ലോകത്തെ രാജാവ് ഇപ്പോൾ ആരാണെന്ന് ചോദിച്ചാൽ നിസംശയം പറയാം അത് ദാമു ആണെന്ന്.ഷാഫി സംവിധാനം ചെയ്ത ചട്ടമ്പിനാട് എന്ന ചിത്രത്തിലാണ് ദാമു എന്ന കഥാപാത്രം പിറവിയെടുത്തത്. സുരാജ് വെഞ്ഞാറമൂട് ആണ് ദശമൂലം ദാമുവിനെ അവതരിപ്പിച്ചത്.
മമ്മൂട്ടി നായകനായ ചിത്രമായിരുന്നു എങ്കിലും നായകനെക്കാള്‍ ജനപ്രീതിയുമായി ദശമൂലം ദാമു ഇപ്പോഴും ലൈവാണ്. ചിത്രം ഇറങ്ങിയ കാലത്ത് വലിയ ചര്‍ച്ചകള്‍ ഒന്നും ആയില്ലെങ്കിലും ഒന്‍പത് വര്‍ഷത്തിനിപ്പുറം സൈബര്‍ ലോകത്തെ ട്രോള്‍ രാജാവാണ് ദാമു, വളരെ പെട്ടെന്നാണ് ട്രോളന്മാരുടെ ഹൃദയത്തില്‍ ഈ കഥാപാത്രം തരംഗം സൃഷ്ടിച്ചത്.
ഇപ്പോഴിതാ ദശമൂലം ദാമു എന്ന ടൈറ്റില്‍ തന്നെ വൈകാതെ ഒരു ചിത്രമുണ്ടാവുമെന്ന സൂചനയുമായി സംവിധായകന്‍ ഷാഫി രംഗത്തെത്തിയിരിക്കുകയാണ്. ചട്ടമ്പിനാടിലെ ദശമൂലം ദാമുവിനെ ടൈറ്റില്‍ റോളില്‍ അവതരിപ്പിക്കുന്ന ഒരു ചിത്രം താമസിക്കാതെ തന്നെ ഉണ്ടാകുമെന്നാണ് സംവിധായകന്‍ പറയുന്നത്. ദാമുവിനെ നായകനാക്കി ചെയ്യാന്‍ പറ്റിയ ഒരു കഥ തന്റെ പക്കലുണ്ടെന്നും സംവിധായകന്‍ പറഞ്ഞു.
ഒരു ബോംബ് കഥയ്ക്ക് ശേഷം ധാരാളം ചിത്രങ്ങള്‍ അണിയറയിലുണ്ടെന്നും എങ്ങിനെ തുടങ്ങണമെന്ന ആശങ്കയിലാണ് താനെന്നും എന്നാല്‍ സാഹചര്യങ്ങള്‍ ഒത്തുവന്നാല്‍ ഒട്ടും വൈകിപ്പിക്കാതെ തന്നെ ദശമൂലം ദാമുവിന്റെ വര്‍ക്കുകളിലേക്ക് കടക്കുമെന്നും ഷാഫി പറഞ്ഞു.
