ദിലീപിനെ നായകനാക്കി നാദിർഷ സംവിധാനം ചെയ്ത ‘കേശു ഈ വീടിന്റെ നാഥൻ’ ഡിസ്നി പ്ലസ് ഹോട്ട്സ്റ്റാറിൽ. ചിത്രം മികച്ച പ്രേക്ഷകാഭിപ്രായം നേടി മുന്നേറുന്നതിന് ഇടയിൽ ചില വെളിപ്പെടുത്തലുകളുമായി എത്തിയിരിക്കുകയാണ് സംവിധായകനും നായകനും. കേശുവാകാൻ നാദിർഷ ആദ്യം മനസിൽ കണ്ടത് മറ്റ് ചില താരങ്ങളെ ആയിരുന്നെന്നും എന്നാൽ അവസാനം അത് ദിലീപിലേക്ക് എത്തി ചേരുകയായിരുന്നെന്നും ഇരുവരും പറഞ്ഞു.
തങ്ങള് തമ്മിൽ ഒരുമിക്കുമ്പോൾ ഉണ്ടാകുന്ന ഒരു സിനിമ അതിന്റേതായ രീതിയിലുള്ള ഒരു സിനിമ ആയിരിക്കണമെന്ന് പലരും പറഞ്ഞിട്ടുണ്ടെന്ന് നാദിർഷ പറഞ്ഞു. ‘അത്രയും തമാശകള് പ്രതീക്ഷിക്കുന്നുണ്ട്. ജനത്തിന് പിടിക്കുന്ന ഒരു സിനിമ ആയിരിക്കണം എന്നുള്ളത് ജനങ്ങളും ആഗ്രഹിക്കുന്നുണ്ട്, ഞങ്ങളും ആഗ്രഹിക്കുന്നുണ്ട്. അത്തരത്തിലുള്ള ഒരു കഥ എന്ന് പറയുമ്പോൾ രണ്ടു പേർക്കും ആപ്റ്റ് ആയിട്ടുള്ള കഥകൾ വേണം. പല കഥകളും കേട്ടിട്ടുണ്ട്. എന്റെ ആദ്യത്തെ സിനിമ ചെയ്യുന്നതിനു മുമ്പേ കേട്ടിട്ടുണ്ട്. പക്ഷേ, അത് ഒന്നും ഒരുമിച്ച് ചെയ്യാൻ പറ്റുന്നതല്ല എന്ന് തോന്നി പല കഥകൾ മാറി മാറി വന്നു. ഒടുവിൽ കേശു വന്നപ്പോൾ അത് സംഭവിക്കുകയായിരുന്നു.’ – നാദിർഷ പറഞ്ഞു.
കേശു എന്ന ചിത്രം നിർമിക്കാൻ വന്ന പടമാണെന്ന് ദിലീപ് വ്യക്തമാക്കി. ‘നാദിർഷ എന്റെ അടുത്ത് പറഞ്ഞു, കഥ കേട്ടു നമുക്ക് പ്രൊഡ്യൂസ് ചെയ്യാമെന്ന്. കഥ കേട്ടപ്പോൾ സംഭവം കൊള്ളാമെന്ന് തോന്നി, അതിലെ കുറേ സീക്വൻസുകള് കാണാത്ത സീക്വൻസുകളാ. അത് മനസിലങ്ങനെ കിടന്നു. നെടുമുടി വേണു, ഇന്നസെന്റ്, അലൻസിയാർ ഇത്രയും പേരെ കേശുവാകാൻ ആലോചിച്ചു. ഈ ചർച്ച നടക്കുന്നതിനിടയിൽ ഞാൻ ഇവരോട് ഞാൻ ഈ റോള് ചെയ്താലോ എന്ന് ചോദിച്ചു. സുരാജിനെ ഈ റോളിലേക്ക് വിളിച്ചപ്പോഴും ഒരു ആഴ്ച സമയം ചോദിച്ചിരുന്നു. എനിക്ക് ഈ സിനിമ ചെയ്യാൻ പറ്റുമോ എന്ന കോൺഫിഡൻസും നാദിർഷയും ഞാനും ചേർന്ന് ചെയ്യേണ്ട സിനിമ ഇതാണോ എന്ന ചിന്തയുമായിരുന്നു രണ്ട് കൺഫ്യൂഷൻ.’ – അതിനു ശേഷമാണ് ഞാൻ കേശുവായതെന്ന് ദിലീപ് തുറന്നു പറഞ്ഞു.
ഡിസംബർ 31ന് ആയിരുന്നു ദിലീപിനെ നായകനാക്കി നാദിർഷ സംവിധാനം ചെയ്ത ചിത്രം ‘കേശു ഈ വീടിന്റെ നാഥൻ’ ഡിസ്നി പ്ലസ് ഹോട്ട് സ്റ്റാറിൽ റിലീസ് ആയത്. ദിലീപ് – നാദിർഷ കൂട്ടുകെട്ടിൽ ഒരുങ്ങുന്ന ഫാമിലി കോമഡി ചിത്രമാണ് കേശു ഈ വീടിന്റെ നാഥൻ. സജീവ് പാഴൂർ ആണ് ചിത്രത്തിന് തിരക്കഥയെഴുതുന്നത്. സിനിമയിലെ ദിലീപിന്റെ മേക്ക്ഓവർ ഏറെ ശ്രദ്ധ നേടിയിരുന്നു. ഉർവശി നായികയായി എത്തുന്ന ചിത്രത്തിൽ സലിം കുമാർ, ഹരിശ്രീ അശോകൻ, കലാഭവൻ ഷാജോൺ, ഹരീഷ് കണാരൻ, ശ്രീജിത്ത് രവി, ജാഫർ ഇടുക്കി, കോട്ടയം നസീർ, അനുശ്രീ, സ്വാസിക എന്നിവരും പ്രധാനവേഷത്തിൽ അഭിനയിക്കുന്നുണ്ട്. അനിൽ നായരാണ് ഛായാഗ്രഹണം. ബി കെ ഹരിനാരായണൻ, ജ്യോതിഷ്, നാദിർഷ എന്നിവരുടെ വരികൾക്ക് സംഗീതം നൽകിയിരിക്കുന്നത് നാദിർഷ തന്നെയാണ്.