ദിലീപിനെ നായകനാക്കി നാദിർഷ സംവിധാനം ചെയ്ത ചിത്രം ‘കേശു ഈ വീടിന്റെ നാഥൻ’ ഡിസ്നി പ്ലസ് ഹോട്ട് സ്റ്റാറിൽ റിലീസ് ചെയ്തു. ചിത്രത്തിന് മികച്ച അഭിപ്രായമാണ് ലഭിക്കുന്നത്. ഇതിനിടെ കലാഭവൻ മണിയെക്കുറിച്ച് ദിലീപ് പറഞ്ഞ ചില കാര്യങ്ങളാണ് വൈറലായിരിക്കുന്നത്. സിനിമ ഡാഡിക്ക് നൽകിയ അഭിമുഖത്തിലാണ് ദിലീപ് കലാഭവൻ മണിയെ അനുസ്മരിച്ചത്. ‘നിങ്ങളുടെ എല്ലാ കാര്യങ്ങളും അറിയുന്ന ഒരു പൊതുസുഹൃത്ത് ആരായിരിക്കും’ എന്നായിരുന്നു അവതാരക ദിലീപിനോടും നാദിർഷയോടും ചോദിച്ചത്. ‘അത് പോയി’ എന്നായിരുന്നു ഈ ചോദ്യത്തിന് ദിലീപിന്റെ ആദ്യത്തെ മറുപടി.
അത് കലാഭവൻ മണി ആയിരുന്നു എന്നായിരുന്നു ദിലീപിന്റെയും നാദിർഷയുടെയും ഒരുമിച്ചുള്ള മറുപടി. മണി ഇല്ലാതെ അങ്ങനെ ഷോകൾക്ക് പോയിട്ടില്ല. ഇപ്പോഴും ഷോ ചെയ്യുമ്പോൾ മണിയുടെ പ്രസൻസ് ഷോയിൽ ഉണ്ടാകാറുണ്ടെന്ന് ദിലീപ് പറഞ്ഞു. ഓരോ ഷോകൾ കഴിയുമ്പോഴും റിഫ്രഷ് ആകുകയാണ്. ‘ദിലീപിന് ഒരു സിനിമയിൽ നിന്ന് കിട്ടുന്ന പ്രതിഫലം ഷോയിൽ നിന്ന് കിട്ടാറില്ല. അതിന്റെ പകുതി പോലും ചിലപ്പോൾ ഉണ്ടാകാറില്ല. എന്നാൽ, ആ ഒരു മാസം റിഹേഴ്സലും യാത്രയും മറ്റുമായി എൻജോയ് ചെയ്യുന്ന ആൾക്കാരാ’ – നാദിർഷ പറഞ്ഞു. ഷോ നടത്തുന്നതിൽ പൈസ നോക്കാറില്ലെന്നും അത് ഒരു രസമാണെന്നും നാദിർഷയും ദിലീപും വ്യക്തമാക്കി.
മികച്ച അഭിപ്രായവുമായി ഡിസ്നി പ്ലസ് ഹോട്ട് സ്റ്റാറിൽ ദിലീപ് – നാദിർഷ ചിത്രം കേശു ഈ വീടിന്റെ നാഥൻ പ്രദർശനം തുടരുകയാണ്. സജീവ് പാഴൂർ ആണ് ചിത്രത്തിന് തിരക്കഥയെഴുതുന്നത്. സിനിമയിലെ ദിലീപിന്റെ മേക്ക്ഓവർ ഏറെ ശ്രദ്ധ നേടിയിരുന്നു. ഉർവശി നായികയായി എത്തുന്ന ചിത്രത്തിൽ സിദ്ദിഖ്, സലിം കുമാർ, ഹരിശ്രീ അശോകൻ, കലാഭവൻ ഷാജോൺ, ഹരീഷ് കണാരൻ, ശ്രീജിത്ത് രവി, ജാഫർ ഇടുക്കി, കോട്ടയം നസീർ, അനുശ്രീ, സ്വാസിക എന്നിവരും പ്രധാനവേഷത്തിൽ അഭിനയിക്കുന്നുണ്ട്. അനിൽ നായരാണ് ഛായാഗ്രഹണം. ബി കെ ഹരിനാരായണൻ, ജ്യോതിഷ്, നാദിർഷ എന്നിവരുടെ വരികൾക്ക് സംഗീതം നൽകിയിരിക്കുന്നത് നാദിർഷ തന്നെയാണ്. കുടുംബ പശ്ചാത്തലത്തിൽ ഹാസ്യത്തിൽ കലർന്ന കഥയാണ് സിനിമ പറയുന്നത്.
