കേരളത്തെ ഒന്നാകെ നാണം എടുത്തിയ സംഭവമായി തീർന്നിരിക്കുകയാണ് മിന്നൽ മുരളിയുടെ സെറ്റ് വർഗീയവാദികൾ നശിപ്പിച്ചത്. ടോവിനോ തോമസിനെ നായകനാക്കി ബേസിൽ ജോസഫ് സംവിധാനവും സോഫിയ പോൾ നിർമാണവും നിർവഹിക്കുന്ന മിന്നൽ മുരളിക്കായി കാലടിയിൽ സ്ഥാപിച്ചിരുന്ന 80 ലക്ഷം രൂപ വിലമതിക്കുന്ന സെറ്റ് ഇന്നലെ ഒരു കൂട്ടം വർഗീയവാദികൾ അടിച്ചു തകർത്തിരുന്നു. മലയാളികളെ ഒന്നാകെ ഞെട്ടിക്കുകയും ആശങ്കപ്പെടുത്തുകയും ചെയ്‌തിരിക്കുന്ന ഈ സംഭവത്തിൽ പ്രതികരണവുമായി എത്തിയിരിക്കുകയാണ് പ്രശസ്‌ത സംവിധായകൻ ലിജോ ജോസ് പെല്ലിശ്ശേരി. “അക്ഷരം തെറ്റാതെ ചെറ്റത്തരം എന്ന് വായിക്കാം . പ്രളയമുണ്ടായപ്പോൾ അവിടെയുണ്ടായ വെള്ളം മുഴുവൻ നിങ്ങൾ കുടിച്ചു വറ്റിക്കുകയായിരുന്നോ” എന്നാണ് അദ്ദേഹം ഫേസ്ബുക്കിൽ കുറിച്ചത്.
അതേ സമയം ഇങ്ങനെ ഒരു പ്രവൃത്തി നടത്തിയ വർഗീയ വാദികൾക്ക് എതിരെ നിയമ നടപടിക്ക് ഒരുങ്ങുകയാണ് മിന്നൽ മുരളിയുടെ അണിയറപ്രവർത്തകർ. നായകനായ ടോവിനോ തോമസും നിർമാതാവ് സോഫിയ പോളും ഇക്കാര്യം വ്യക്തമാക്കി കഴിഞ്ഞു.
