ഒരു ഇടവേളക്ക് ശേഷം സംവിധായകൻ സിദ്ധിഖ് പുതിയ ചിത്രവുമായി മലയാളി പ്രേക്ഷകർക്ക് മുന്നിലേക്ക് എത്തുന്നു. പക്ഷേ ഇത്തവണ സംവിധായകന്റെ കുപ്പായത്തിൽ അല്ല, ഒരു പിടി നല്ല കഥകളെ പരിചയപ്പെടുത്തുന്ന അവതാരകന്റെ റോളിലാണെന്ന് മാത്രം. 23 ഫീറ്റ് എന്റർടൈൻമെന്റ്സിന്റെയും സൈന പിക്ച്ചേഴ്‌സിന്റെയും ബാനറിൽ അർജുൻ രവീന്ദ്രനും ആഷിക് ബാവയും ചേർന്ന് നിർമ്മിക്കുന്ന മധുരം ജീവാമൃതബിന്ദു എന്ന ചിത്രം അവതരിപ്പിക്കുന്നത് സംവിധായകൻ സിദ്ധിഖാണ്. മണിയറയിലെ അശോകൻ, നിഴൽ, അനുഗ്രഹീതൻ ആന്റണി, മറിയം വന്നു വിളക്കൂതി എന്നീ സിനിമകൾക്ക് ശേഷം സംവിധായകരായ ഷംസു സെയ്ബ, അപ്പു ഭട്ടതിരി, പ്രിൻസ് ജോയ് , ജെനിത് കാച്ചപ്പിള്ളി എന്നിവരുടെ നാല് ചിത്രങ്ങളാണ് ഈ ആന്തോളജിയിൽ ഉള്ളത്.
വർഷങ്ങളായി മലയാളികൾക്ക് സുപരിചിതമായ സൈന നിർമ്മാണരംഗത്തേക്ക് കടക്കുന്ന ചിത്രം കൂടിയാണിത്. മലയാളികളുടെ സ്വീകരണമുറിയിലെ എന്റർടൈൻമെന്റ് സാന്നിധ്യമായ സൈന ചലച്ചിത്ര നിർമ്മാണ രംഗത്തേക്ക് കടക്കുകയാണ് മധുരം ജീവാമൃതബിന്ദു എന്ന ആന്തോളജിയിലൂടെ. കേരളാ കഫേക്കും അഞ്ചു സുന്ദരികൾക്കും ശേഷം മലയാളത്തിൽ നിന്നും എത്തുന്ന മറ്റൊരു ആന്തോളജി കൂടിയാണിത്.
