ബാഹുബലിക്ക് ശേഷം എസ്.എസ് രാജമൗലി ഒരുക്കുന്ന ബ്രഹ്‌മാണ്ഡ ചിത്രമാണ് ആര്‍ആര്‍ആര്‍. രാം ചരണ്‍ തേജ, ജൂനിയര്‍ എന്‍ടിആര്‍ എന്നിവരാണ് ചിത്രത്തിലെ കേന്ദ്രകഥാപാത്രങ്ങള്‍. മാര്‍ച്ച് 25 നാണ് ചിത്രം പ്രേക്ഷകരിലേക്ക് എത്തുക. ചിത്രത്തിന്റെ പ്രൊമോഷന്റെ ഭാഗമായി നടത്തിയ ഇന്റര്‍വ്യൂവില്‍ മലയാളികളെക്കുറിച്ചും പരാമര്‍ശിച്ചിരിക്കുകയാണ് രാജമൗലി. മലയാളികള്‍ ഏറ്റെടുത്താല്‍ ആര്‍ആര്‍ആര്‍ ലോകമെമ്പാടും എത്തുമെന്നാണ് രാജമൗലി പ്രതീക്ഷിക്കുന്നത്.
കേരളത്തില്‍ തങ്ങളുടെ മാസ് മസാല രീതിയിലുള്ള സിനിമകള്‍ സ്വീകരിക്കപ്പെട്ടാല്‍ ലോകം മുഴുവനും എത്തിച്ചേരുമെന്ന് ഉറപ്പിക്കാനാകുമെന്ന് രാജമൗലി പറഞ്ഞു. ലോകം മുഴുവന്‍ സംസ്‌കാരവും ഭാഷയും എല്ലാം വ്യത്യാസമാണെങ്കിലും എല്ലാവരുടേയും വികാരങ്ങള്‍ ഒന്നാണ്. അത് കഥയിലുണ്ടാകും, അതാണ് തന്റെ സിനിമയെ യൂണിവേഴ്‌സല്‍ ആക്കുന്നത്. അത്തരത്തിലുള്ള സിനിമകളാണ് പാന്‍ ഇന്ത്യന്‍ രീതിയില്‍ വിപണി കണ്ടെത്തുന്നത്. അതല്ലാതെ തെലുങ്ക് ഓഡിയന്‍സിനായി മാത്രമുള്ള സിനിമകള്‍ അവിടെ മാത്രം ഒതുക്കാറുണ്ടെന്നും രാജമൗലി പറഞ്ഞു.
സിനിമകള്‍ ഏറെ ചര്‍ച്ചചെയ്യപ്പെടുന്ന കാലഘട്ടമാണ്. മത്സരം കൂടുതലാണ്. നല്ലതും മോശവുമായ റിവ്യൂകളൊന്നും ബാധിക്കാറില്ല. തന്റെ സിനിമകളെ പറ്റി ആരും സംസാരിക്കാതിരുന്നാലാണ് വിഷമം. ബാഹുബലിയുടെ വലിയ വിജയം തന്നെ ഭയപ്പെടുത്തുന്നില്ല. കഴിഞ്ഞ സിനിമയെ പോകാനായി അനുവദിക്കുക എന്നതാണ് തന്റെ ശീലം. പക്ഷേ അത് നല്‍കിയ നല്ലതും മോശവുമായ ഓര്‍മ്മകള്‍ ഇപ്പോഴും കൂടെയുണ്ടെന്നും രാജമൗലി കൂട്ടിച്ചേര്‍ത്തു.
