മാധ്യമപ്രവർത്തകൻ എം വി നികേഷ് കുമാറിന് പിന്തുണയുമായി സംവിധായകൻ വി എ ശ്രീകുമാർ. സോഷ്യൽ മീഡിയയിൽ പങ്കുവെച്ച പോസ്റ്റിലാണ് ശ്രീകുമാർ പിന്തുണ അറിയിച്ചത്. നികേഷിന്റെ മൗനം പലരും ആഗ്രഹിക്കുന്നുണ്ടാകാമെന്നും നികേഷിനെ ഭയപ്പെടുത്താമെന്ന തോന്നൽ ചരിത്രം അറിയാത്തവരുടെ വകതിരിവ് ഇല്ലായ്മയാണെന്നും ശ്രീകുമാർ കുറിച്ചു. അനീതിക്കെതിരെ നികേഷ് നടത്തുന്ന മാധ്യമ പ്രവർത്തനത്തിന് പിന്തുണ. നികേഷ് ഏതു ചാനലിൽ എന്നല്ല, മലയാളി നികേഷിനൊപ്പമാണെന്നും ശ്രീകുമാർ പറഞ്ഞു.
വി എ ശ്രീകുമാർ സോഷ്യൽമീഡിയയിൽ കുറിച്ചത് ഇങ്ങനെ, ‘ഇന്ത്യാവിഷനിലൂടെ എം വി നികേഷ് കുമാർ തുടക്കമിട്ട സധൈര്യ മാധ്യമപ്രവർത്തനം കേരളത്തിന്റെ ദൃശ്യമാധ്യമങ്ങളുടെ സർവകലാശാലയാണ്. നികേഷിന്റെ മൗനം പലരും ആഗ്രഹിക്കുന്നുണ്ടാകാം. വഴങ്ങിയില്ലെങ്കിൽ ഭീഷണി എന്നത് കുറേക്കാലമായി നികേഷ് നേരിടുന്നതാണ്. നികേഷിനെ ഭയപ്പെടുത്താമെന്ന തോന്നൽ ചരിത്രം അറിയാത്തവരുടെ വകതിരിവ് ഇല്ലായ്മയാണ്. അനീതിക്കെതിരെ നികേഷ് നടത്തുന്ന മാധ്യമ പ്രവർത്തനത്തിന് പിന്തുണ.
നികേഷ് ഏതു ചാനലിൽ എന്നല്ല, മലയാളി നികേഷിനൊപ്പമാണ്. ജേർണലിസ്റ്റ് എന്ന നിലയിൽ നികേഷ് സത്യത്തിനായി നിലപാടെടുത്ത ഓരോ സംഭവങ്ങളും സൃഷ്ടിച്ച കോളിളക്കം നമുക്കു മുന്നിലുണ്ട്. നീതിയാണ് നടപ്പാകേണ്ടത്, അതിന് നികേഷിന്റെ ശബ്ദം കൂടുതൽ ഉയരണം. നീതിക്കായി നിലപാടെടുക്കുന്ന എല്ലാ മാധ്യമ പ്രവർത്തനങ്ങൾക്കും ഒപ്പം. ജനകീയ വിചാരണകൾ ജനാധിപത്യത്തിന്റെ ഭാഗം തന്നെയാണ്. മാധ്യമ സംവാദങ്ങൾ കണ്ണാടിയാണ്. പ്രതിബിംബം കണ്ട് കണ്ണാടി തല്ലിപ്പെട്ടിക്കുന്നവരോട് പ്രത്യേകിച്ച് ഒന്നും പറയാനില്ല.
#നികേഷിനൊപ്പം.’- ശ്രീകുമാർ കുറിച്ചു.
