ബിഗ് ബോസ് സീസൺ 2 വിൽ നിന്നും അപ്രതീക്ഷിതമായി പുറത്താക്കപ്പെട്ട രജിത് കുമാറിനെതിരെ രംഗത്തെത്തിയിരിക്കുകയാണ് മുൻ മത്സരാർത്ഥിയും സാമൂഹ്യപ്രവർത്തകയുമായ ദിയ സന. രജിതകുമാറിന്റെ ഉള്ളിലെ ക്രിമിനൽ സ്വഭാവം പുറത്തുവന്നിരിക്കുകയാണ് എന്നും അദ്ദേഹത്തിനെതിരെ നടപടി എടുക്കണമെന്നും ആയിരുന്നു ദിയയുടെ വാദം. കണ്ണിന് അണുബാധ ബാധിച്ച് ചികിത്സയിലായിരുന്ന ഒരു കുട്ടിയോട് ഇത്തരത്തിലുള്ള ക്രൂരത കാണിക്കാൻ ഇത്രയും വിദ്യാഭ്യാസമുള്ള ഒരു വ്യക്തിക്ക് എങ്ങനെ സാധിച്ചു എന്നാണ് തനിക്ക് മനസിലാകാത്തത് എന്നാണ് ദിയ പറയുന്നത്.
ഒരു സ്ത്രീയെന്ന നിലയിൽ തനിക്ക് രജിത് കുമാറിന്റെ പ്രവർത്തികളെ അംഗീകരിക്കാൻ സാധിക്കില്ല എന്നും രേഷ്മയെ ഉപദ്രവിക്കണമെന്ന് അദ്ദേഹം മുൻകൂട്ടി തീരുമാനിച്ചതാണെന്നും ദിയ പറയുന്നു. ടൈംസ് ഓഫ് ഇന്ത്യയുമായുള്ള അഭിമുഖത്തിലാണ് ദിയ സന ഇത് വെളിപ്പെടുത്തിയത്. രേഷ്മ എന്ന സഹ മത്സരാർത്ഥിയുടെ കണ്ണിൽ മുളക് തേച്ചതിന്റെ ഭാഗമായിട്ടാണ് രജിത് കുമാറിനെ ബിഗ്ബോസിൽ നിന്നും പുറത്താക്കിയത്.
