മലയാളസിനിമയിലെ ആദ്യ 50 കോടി ചിത്രമായ ദൃശ്യത്തിന് ശ്രീലങ്കയിലും പകരം വെക്കാനില്ലാത്ത നേട്ടം. കന്നഡ, തെലുങ്ക്, തമിഴ്, ഹിന്ദി തുടങ്ങിയ ഭാഷകളിൽ റീമേക്ക് ചെയ്യപ്പെട്ട ഈ മോഹൻലാൽ – ജീത്തു ജോസഫ് ചിത്രം സിംഹളീസ് ഭാഷയിൽ ധർമയുദ്ധയ എന്ന പേരിലും റീമേക്ക് ചെയ്‌തിരുന്നു. 2 തമിഴ് ചിത്രങ്ങൾ സംവിധാനം ചെയ്‌തിട്ടുള്ള ചെയ്യാർ രവിയാണ് ചിത്രം സിംഹളീസ് ഭാഷയിൽ സംവിധാനം നിർവഹിച്ചത്. 2017 ജൂലൈ 14നാണ് ചിത്രം തീയറ്ററുകളിൽ എത്തിയത്. നിർഭാഗ്യവശാൽ സംവിധായകൻ ചെയ്യാർ രവി റിലീസിന് മുന്നേ കാർഡിയാക് അറസ്റ്റ് വന്ന് മരണത്തിന് കീഴടങ്ങിയിരുന്നു. ഇതുവരെ ശ്രീലങ്കയിൽ ഇറങ്ങിയിട്ടുള്ള റീമേക്ക് ചിത്രങ്ങളിൽ ബോക്സ് ഓഫീസിൽ ഏറ്റവും കൂടുതൽ കളക്ഷൻ നേടിയ ചിത്രമായി തീർന്നിരിക്കുകയാണ് ധർമയുദ്ധയ. ചിത്രത്തിന്റെ വിജയാഘോഷവേളയിൽ ദൃശ്യം സംവിധായകൻ ജീത്തു ജോസഫും പങ്കെടുത്തിരുന്നു.
ജാക്‌സൺ അന്തോണി, ദിൽഹാനി ഏകനായകെ, കുസും രേണു, കുമാര തിരിമധുര, തിസുരി യുവാനിക, റോഷൻ പിലാപിതിയ തുടങ്ങിയവരാണ് ചിത്രത്തിൽ വേഷമിട്ടത്. 17 കോടി ശ്രീലങ്കൻ രൂപയാണ് 12 ആഴ്‌ചകൾ കൊണ്ട് ചിത്രം സിംഹളീസ് ബോക്സ് ഓഫീസിൽ നിന്നും നേടിയെടുത്തത്. സിരാസ ഫിലിംസിന് വേണ്ടി എം ടിവിയാണ് ചിത്രം നിർമ്മിച്ചത്.
