മലയാളികളുടെ പ്രിയതാര ജോഡികളായ നസ്രിയയും ഫഹദും ബാംഗ്ലൂർ ഡെയ്സിന് ശേഷം ഒന്നിക്കുന്ന ചിത്രമാണ് ട്രാൻസ്. ചിത്രം ഫെബ്രുവരി 14ന് തിയറ്ററുകളിലെത്തും. ചിത്രത്തിന്റെ വിശേഷങ്ങൾ ഇപ്പോൾ പങ്കുവയ്ക്കുകയാണ് ഫഹദ് ഫാസിൽ. തന്റെ കരിയറിലെ തന്നെ ഏറ്റവും ബുദ്ധിമുട്ടേറിയ കഥാപാത്രങ്ങളില്‍ ഒന്നായിരുന്നു ട്രാന്‍സ് എന്നും അത് ഷൂട്ട് ചെയ്യാനോ, ക്യാപ്ചര്‍ ചെയ്യാനോ, പെര്‍ഫോം ചെയ്യാനോ അത്ര എളുപ്പമുള്ള ഒരു സിനിമ അല്ലായിരുന്നു എന്നും താരം പറയുന്നു. തന്റെ കരിയറിലെ ഏറ്റവും ബുദ്ധിമുട്ടേറിയ കഥാപാത്രത്തെയാണ് താൻ ട്രാൻസിൽ അവതരിപ്പിച്ചത് എന്ന് ഫഹദ് പറയുമ്പോൾ നേരെ എതിർ അഭിപ്രായം ആണ് നസ്രിയ പറയുന്നത്.
ചിത്രത്തിൽ തനിക്ക് ഹെവി വർക്ക് ഇല്ലായിരുന്നുവെന്ന് നസ്രിയ അവകാശപ്പെടുന്നു. തനിക്ക് ചിത്രത്തിന്റെ ഷൂട്ടിംഗ് സമയത്ത് ചുറ്റുമുണ്ടായിരുന്നത് പരിചയമുള്ള മുഖങ്ങൾ ആയിരുന്നു എന്നും അതുകൊണ്ട് തന്നെ യാതൊരു ബുദ്ധിമുട്ടും തോന്നിയില്ല എന്നും താരം പറയുന്നു. ഏഴു വർഷത്തിനു ശേഷം അൻവർ റഷീദ് ഒരുക്കുന്ന ചിത്രത്തിൽ മോട്ടിവേഷണല്‍ ട്രെയ്നറായി ഫഹദ് എത്തുമ്പോൾ എസ്തര്‍ ലോപ്പസ് എന്ന കഥാപാത്രത്തെയാണ് നസ്രിയ അവതരിപ്പിക്കുന്നത്.
ചിത്രത്തിൽ
ഫഹദ് ഫാസിലിനെ കൂടാതെ വിനായകന്‍, ഗൗതം വാസുദേവ് മേനോന്‍, നസ്രിയാ നസിം, സൗബിന്‍ ഷാഹിര്‍, ശ്രീനാഥ് ഭാസി, ഷെയ്ന്‍ നിഗം എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു. ഇതുവരെ കാണാത്ത പുതിയ ഗെറ്റപ്പുകളിൽ ഫഹദ് എത്തുന്ന ചിത്രത്തിന്റെ ഛായാഗ്രഹണം നിർവഹിക്കുന്നത് അമൽ നീരദ് ആണ്. സൗണ്ട് ഡിസൈനർ റസൂൽ പൂക്കുട്ടിയാണ്.രാജമാണിക്യം, അണ്ണൻതമ്പി ,ചോട്ടാമുംബൈ, ഉസ്താദ് ഹോട്ടൽ എന്നിങ്ങനെ എണ്ണം പറഞ്ഞ നിരവധി ഹിറ്റുകൾ ആണ് അൻവർ റഷീദിന്റെ സംവിധാനത്തിൽ ഒരുങ്ങിയത്.
