ഫഹദ് ഫാസിലും സംവിധായകൻ മഹേഷ് നാരായണും ഒന്നിച്ച ബ്ലോക്ക് ബസ്റ്റർ ഹിറ്റായ ചലച്ചിത്രമാണ് ടേക്ക് ഓഫ്. ഇറാഖ് യുദ്ധകാലത്ത് ബന്ദികളായി അകപ്പെട്ട ഇന്ത്യൻ നേഴ്സുമാരെ രക്ഷപ്പെടുത്തിയ കഥ പറഞ്ഞ ചിത്രം മലയാളത്തിലെ ഏറ്റവും വലിയ ഹിറ്റ് ചിത്രങ്ങളിൽ ഒന്നാണ്. എഡിറ്ററായ മഹേഷ് നാരായണൻ ആദ്യമായി സംവിധാനം ചെയ്ത ചിത്രവും ഇതു തന്നെ. ഫഹദ് ഫാസിലിനെയും നിമിഷ സജയനെയും കേന്ദ്ര കഥാപാത്രങ്ങളാക്കി മഹേഷ് നാരായണൻ സംവിധാനം ചെയ്യുന്ന അടുത്ത ചിത്രമാണ് മാലിക്. നേരത്തെ ചിത്രത്തിനായുള്ള ഫഹദിന്റെ മേക്കോവർ പുറത്തിറങ്ങിയിരുന്നു. മെലിഞ്ഞുണങ്ങിയ ഫഹദിനെ കണ്ട് എല്ലാവരും ഞെട്ടിയിരുന്നു. ഇപ്പോഴിതാ ക്ളീൻ ഷേവ് ലുക്കിലും താടി വെച്ച ലുക്കിലുമുള്ള ഫഹദിന്റെ പുതിയ ചിത്രങ്ങൾ വീണ്ടും ശ്രദ്ധ പിടിച്ചു പറ്റുകയാണ്.
25 കോടി ബഡ്ജറ്റ് കണക്കാക്കുന്ന ഈ ബിഗ് ബഡ്ജറ്റ് ചിത്രത്തിൽ വലിയ താരനിര തന്നെയാണ് ഉള്ളത്. ബിജു മേനോൻ, വിനയ് ഫോർട്ട്, ദിലീഷ് പോത്തൻ, അപ്പനി ശരത്ത്, ഇന്ദ്രൻസ്, പഴയ സൂപ്പർ സ്റ്റാർ നായിക ജലജ എന്നിവരും ചിത്രത്തിൽ വേഷമിടുന്നു. ആന്റോ ജോസഫ് ആണ് ചിത്രം നിർമിക്കുന്നത്. ടേക്ക് ഓഫിന് തന്നെ ദേശീയ അവാർഡ് വാങ്ങിയ സന്തോഷ് രാമൻ കലാസംവിധാനവും സാനു ജോൺ വർഗീസ് ക്യാമറയും സുഷിൻ ശ്യം സംഗീതവും ചിത്രത്തിന് വേണ്ടി നിർവഹിക്കുന്നു. 2020 ഏപ്രിൽ മൂന്നിന് ചിത്രം തിയറ്ററുകളിൽ എത്തും.
