ഒരു കാലഘട്ടത്തിൽ മലയാള സിനിമാ പ്രേക്ഷകർക്കിടയിൽ വമ്പൻ ഓളം സൃഷ്‌ടിച്ച തന്റെ കിടിലൻ ആക്ഷൻ രംഗങ്ങളിലൂടെ യുവാക്കളുടെ ഇടയിൽ സൂപ്പർ താരമായി മാറിയ വ്യക്തിയായിരുന്നു ബാബു ആന്റണി. പിന്നീട് വില്ലൻ വേഷത്തിലും തിളങ്ങിയ ബാബു ആന്റണി ഒരിടവേളക്ക് ശേഷം പ്രശസ്ത സംവിധായകൻ ഒമർ ലുലു സംവിധാനം ചെയ്യാൻ പോകുന്ന ബിഗ് ബജറ്റ് ആക്ഷൻ ചിത്രമായ പവർ സ്റ്റാറിലൂടെ നായകനായി മലയാള സിനിമയിലേക്ക് തിരിച്ചെത്തുകയാണ്. ചിത്രത്തിൽ ബാബു ആന്റണിക്കൊപ്പം ഹോളിവുഡ് താരം ലൂയിസ് മാൻഡിലോറും എത്തുന്നു എന്ന വാർത്തയും കഴിഞ്ഞ ദിവസം പുറത്ത് വന്നിരുന്നു.
ഇപ്പോഴിതാ ഒമർ ലുലു സോഷ്യൽ മീഡിയയിൽ പങ്ക് വെച്ച ഒരു ഫാൻമേഡ് പോസ്റ്റർ ആരാധകരെ ആവേശം കൊള്ളിച്ചിരിക്കുകയാണ്. ബാബു ആന്റണിക്കും ലൂയിസ് മാൻഡിലോറിനൊപ്പം ബാബുരാജ്, റിയാസ് ഖാൻ, അബു സലിം തുടങ്ങിയവരും കൂടിയുള്ള പോസ്റ്റർ കണ്ടതോടെ ആരാധകർ ഇത് പെർഫെക്റ്റ് കാസ്റ്റിംഗ് ആണെന്നാണ് പറയുന്നത്. വേറെ പല പേരുകളും ആരാധകർ നിർദ്ദേശിക്കുന്നുമുണ്ട്. റഹ്മാൻ, ഭീമൻ രഘു, ചെമ്പൻ വിനോദ് എന്നിവരുടെ പേരുകളെല്ലാം ആരാധകർ നിർദ്ദേശിക്കുന്നുണ്ട്.
