മലയാള സിനിമയ്ക്ക് എന്നും മികച്ച സിനിമകൾ സംഭാവന ചെയ്ത പ്രൊഡക്ഷൻ ഹൗസ് ആണ് ഫ്രൈഡേ ഫിലിം ഹൗസ്. മികച്ച സിനിമകളോടൊപ്പം തന്നെ മികച്ച നവാഗത സംവിധായകരേയും ഫ്രൈഡേ ഫിലിം ഹൗസ് മലയാള സിനിമയ്ക്ക് സംഭാവന ചെയ്തിട്ടുണ്ട്. ഇപ്പോഴിതാ നവാഗതസംവിധായകർക്കും നവാഗത സിനിമാ കൂട്ടായ്മയ്ക്കും വേണ്ടി മാത്രമായി പുതിയ ഒരു പ്രൊഡക്ഷൻ ഹൗസ് തുടങ്ങുകയാണ് ഫ്രൈഡേ ഫിലിം ഹൗസ്. ഫ്രൈഡേ ഫിലിം ഹൗസ് എക്സ്പെരിമെന്റ്സ് എന്ന് പേരിട്ടിരിക്കുന്ന പ്രൊഡക്ഷൻ ഹൗസ് ഇനി നവാഗതരായ സംവിധായകരുടെ സിനിമകൾ മാത്രമായിരിക്കും നിർമ്മിക്കുക. ഫ്രൈഡേ ഫിലിം ഹൗസ് ആകട്ടെ മറ്റു സിനിമകളും നിർമ്മിച്ച് തിയേറ്ററുകളിലെത്തിക്കും.
വളർന്നുവരുന്ന കഴിവുറ്റ കലാകാരന്മാരെ പ്രോത്സാഹിപ്പിക്കുക എന്ന ഉദ്ദേശത്തോടുകൂടിയാണ് വിജയ് ബാബു ഈ പുതിയ സംരംഭം ആരംഭിക്കുന്നത്. ഈ സംരംഭത്തിലെ ആദ്യചിത്രത്തിന്റെ പ്രഖ്യാപനം ഇന്നലെ ജൂൺ സിനിമയുടെ നൂറാം ദിന ആഘോഷ പരിപാടിയിൽ വിജയ് ബാബു നിർവഹിച്ചു. ജനമൈത്രി എന്നാണ് ചിത്രത്തിന് പേര്. ചിത്രത്തിൻറെ ഷൂട്ടിംഗ് നിലവിൽ പൂർത്തിയായിക്കഴിഞ്ഞു. സൈജു കുറുപ്പും ബിഗ് ബോസ് ഫെയിം സാബുമോനും വിജയ് ബാബുവും ഇന്ദ്രൻസും ആണ് ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നത്. നവാഗതനായ ജോൺ മന്ത്രിക്കൽ ആണ് ചിത്രം സംവിധാനം ചെയ്യുന്നത്. വിഷ്ണുനാരായണൻ ചായാഗ്രഹണവും ഷാൻ റഹ്മാൻ ഞാൻ സംഗീതവും നിർവഹിക്കുന്നു. ചിത്രം ഉടൻ തിയേറ്ററുകളിലെത്തും
