മമ്മൂക്ക സമ്മാനിച്ച ഒരു സമ്മാനം ഇന്നും ജി എസ് പ്രദീപ് തന്റെ നെഞ്ചോട് ചേർത്ത് വെച്ചിട്ടുണ്ട്. എന്തൊക്കെ സംഭവിച്ചാലും ഒരിക്കലും നഷ്ടപ്പെടുത്താത്ത ആ സമ്മാനത്തെ കുറിച്ച് താൻ ആദ്യമായി സംവിധാനം നിർവഹിക്കുന്ന സ്വർണ്ണമത്സ്യങ്ങൾ എന്ന ചിത്രത്തിന്റെ ഓഡിയോ ലോഞ്ച് വേദിയിൽ വെച്ച് ജി എസ് പ്രദീപ് തുറന്ന് പറഞ്ഞു. മമ്മൂക്കയെ സാക്ഷി നിർത്തിയാണ് അദ്ദേഹം ഇത് പറഞ്ഞതും.
“എന്റെ കോട്ടിന് ഇടതുഭാഗത്ത് നെഞ്ചോട് ചേര്‍ത്ത് ഒരു കുതിരയുടെ രൂപം കുത്തി വച്ചിട്ടുണ്ട്. അതിനെ കുറിച്ച് പലരും എന്നോട് ചോദിക്കാറുണ്ട്. എല്ലാം നഷ്ടപ്പെട്ടിട്ടും, വീട് പോയിട്ടും എന്ത് പ്രതിസന്ധിയുണ്ടായിട്ടും താന്‍ വില്‍ക്കുകയോ പണയം വയ്ക്കുകയോ ചെയ്യാത്ത ഒന്നാണത്. ഇത് എന്നെ ഞാനാക്കിയ, അശ്വമേധം എന്ന പരിപാടി 500 അധ്യായങ്ങള്‍ പൂര്‍ത്തിയാക്കിയപ്പോള്‍ ചാനലിന്റെ ചെയര്‍മാനും ഏവർക്കും പ്രിയങ്കരനുമായ മമ്മൂക്ക എനിക്ക് നെഞ്ചില്‍ കുത്തിത്തന്നതാണ്. ഏത് വസ്ത്രം ധരിച്ചാലും എവിടെ പോയാലും ഞാനിത് കുത്താറുണ്ട്. ഇത് ധരിക്കുന്നത് മനസ്സുകൊണ്ടോ പ്രവര്‍ത്തി കൊണ്ടോ തെറ്റ് ചെയ്യരുതെന്ന് ഓര്‍മപ്പെടുത്തലാണ്.”
