അമൃത സുരേഷിനും മകൾക്കും ഒപ്പം ഓണം ഫോട്ടോഷൂട്ടുമായി ഗോപി സുന്ദർ; രണ്ട് ആൺകുട്ടികളെ മിസ് ചെയ്യുന്നുവെന്ന് ആരാധകർ

നാടെങ്ങും ഓണാഘോഷത്തിന്റെ തിമിർപ്പിലാണ്. പൂക്കളവും ഓണക്കോടിയും ഓണസദ്യയും ഒക്കെയായി എല്ലാവരും ഓണാഘോഷത്തിന്റെ തിരക്കിലാണ്. പ്രേക്ഷകർക്കും ആരാധകർക്കും ആശംസകളുമായി സിനിമാതാരങ്ങളും സോഷ്യൽമീഡിയയിൽ എത്തി. മിക്ക താരങ്ങളും പ്രേക്ഷകരുമായി തങ്ങളുടെ ഓണാഘോഷത്തിന്റെ ചിത്രങ്ങൾ പങ്കുവെച്ചു.

സംഗീതസംവിധായകൻ ഗോപി സുന്ദറും ഓണാഘോഷത്തിന്റെ ചിത്രങ്ങൾ പങ്കുവെച്ചു. അമൃത സുരേഷിനും മകൾക്കും ഒപ്പമായിരുന്നു ഗോപി സുന്ദറിന്റെ ഓണാഘോഷം. പരമ്പരാഗത വേഷങ്ങൾ അണിഞ്ഞാണ് ഗോപി സുന്ദറും അമൃതയും അമൃതയുടെ മകളും ഫോട്ടോയിൽ പ്രത്യക്ഷപ്പെടുന്നത്. ജുബ്ബയും മുണ്ടുമാണ് ഗോപിസുന്ദറിന്റെ വേഷം. തലയിൽ മുല്ലുപ്പൂ ചൂടി ഹാഫ് സാരിയാണ് അമൃത സുരേഷ് അണിഞ്ഞിരിക്കുന്നത്. പട്ടുപാവാടയാണ് അമൃതയുടെ മകളുടെ വേഷം. നിരവധി പേരാണ് ഓണാശംസകളുമായി കമന്റ് ബോക്സിൽ എത്തിയിരിക്കുന്നത്. അതേസമയം, ഗോപി സുന്ദറിനും അമൃതയ്ക്കും ഒപ്പം അമൃതയുടെ മകളെ കണ്ടപ്പോൾ, ‘പടം മനോഹരമായിട്ടുണ്ടെന്നും, രണ്ട് ആൺകുട്ടികളെ മിസ് ചെയ്യുന്നു’ എന്നുമായിരുന്നു ഒരു കമന്റ്. ഗോപി സുന്ദറിന് രണ്ട് ആൺമക്കളാണ് ഉള്ളത്. ഇതിനെക്കുറിച്ച് ആയിരുന്നു പരാമർശം,

പ്രണയത്തിലാണെന്നും ഒരുമിച്ച് ജീവിക്കാൻ തീരുമാനിച്ചെന്നും അടുത്തിടെ ആയിരുന്നു ഗോപി സുന്ദറും അമൃത സുരേഷും ചേർന്ന് വെളിപ്പെടുത്തിയത്. ജീവിതത്തിലെ വിഷമഘട്ടങ്ങൾ പിന്നിട്ട് ഒരുമിച്ച് മനോഹര യാത്ര ആരംഭിക്കുകയാണെന്നും ആരാധകരുടെ സ്നേഹവും പ്രാർത്ഥനയും എന്നും തങ്ങൾക്കൊപ്പം ഉണ്ടാകണമെന്നും അമൃതയും ഗോപി സുന്ദറും കുറിപ്പിലൂടെ അഭ്യർത്ഥിച്ചിരുന്നു.