വനിത മാഗസിന്റെ കവർ ഫോട്ടോയാണ് സോഷ്യൽ മീഡിയയിൽ ഇപ്പോൾ ചർച്ചയായിരിക്കുന്നത്. നടൻ ദിലീപും ഭാര്യ കാവ്യ മാധവനും മക്കളായ മീനാക്ഷിയും മഹാലക്ഷ്മിയും ആണ് കവർ ചിത്രത്തിലുള്ളത്. ഇത് ആദ്യമായാണ് ദിലീപ് കുടുംബത്തോടൊപ്പം ഒരു വനിത മാഗസിന്റെ കവറിൽ പ്രത്യക്ഷപ്പെടുന്നത്. എന്നാൽ, ഇതിനെതിരെ സോഷ്യൽ മീഡിയയിൽ നിരവധി പേരാണ് അനുകൂലവും പ്രതികൂലവുമായ പ്രതികരണങ്ങളായിരുന്നു എത്തിയത്.
ദിലീപിന്റെ കുടുംബചിത്രം കവർ ചിത്രമാക്കിയതിനെ തുടർന്ന് വനിതകളുടെ സുഹൃത്തും വഴികാട്ടിയും എന്ന ലേബലില്‍ പുറത്തിറങ്ങുന്ന മാസികയ്ക്ക് എതിരെ സോഷ്യല്‍ മീഡിയയില്‍ രൂക്ഷ വിമര്‍ശനമാണ് ഉയരുന്നത്. നടിയെ ആക്രമിച്ച കേസിലെ എട്ടാം പ്രതിയും നടനുമായ ദിലീപിന്റെ കുടുംബ സമേതമുള്ള ഫോട്ടോ കവര്‍പേജായി നല്‍കിയതാണ് സോഷ്യല്‍ മീഡിയയെ ചൊടിപ്പിച്ചിരിക്കുന്നത്. ഒരിടവേളയ്ക്ക് ശേഷം നടിയെ ആക്രമിച്ച കേസ് ഇപ്പോള്‍ വീണ്ടും ചര്‍ച്ചയായിരിക്കുകയാണ്.
ഇതിനിടെ ദിലീപിന് പിന്തുണയുമായി ഹരീഷ് പേരടി രംഗത്തെത്തി. ‘കമ്മ്യൂണിസം പറഞ്ഞു എന്ന ഒറ്റ കാരണം കൊണ്ട് ഒരാൾക്ക് അമേരിക്കയിൽ ചികൽസക്കുവേണ്ടി പോകാൻ പാടില്ലെ?..കുറ്റവാളിയാണ് എന്ന് കോടതി പറയാത്ത കാലത്തോളം ഒരു കേസിൽ പ്രതിയാക്കപ്പെട്ട ഒരാൾക്ക് മനോരമയുടെ വനിതയിൽ അഭിമുഖം കൊടുക്കാൻ പാടില്ലെ?..സത്യത്തിൽ ഇതിനെയൊക്കെ വിമർശിക്കുന്നവരുടെ മാനസിക ആരോഗ്യമല്ലെ പരിശോധിക്കപെടെണ്ടത്?..’
