ഷാജി കൈലാസ് – പൃഥ്വിരാജ് സുകുമാരൻ ചിത്രം കടുവയുടെ അവകാശങ്ങൾ വിൽക്കില്ല എന്ന അണിയറ പ്രവർത്തകരുടെ ഉറപ്പ് ഹൈക്കോടതി രേഖപ്പെടുത്തി. ഷൂട്ടിങ്ങ് നിർത്തി വെച്ചുള്ള ഇരിഞ്ഞാലക്കുട മുൻസിഫ് കോടതിയുടെ ഉത്തരവിനെതിരേ ഹൈക്കോടതി ഇടക്കാല ഉത്തരവിറക്കിയിരുന്നു. ആ ഇടക്കാല ഉത്തരവിൻ്റെ കാലാവധി നീട്ടുന്നതിനായാണ് കടുവ സിനിമയുടെ അവകാശങ്ങൾ വിൽക്കില്ല എന്ന തിരക്കഥാകൃത്തിൻ്റെ ഉറപ്പ് ഹൈക്കോടതി രേഖപ്പെടുത്തിയത്. സിനിമയുടെ വിതരണം, ഒറ്റിറ്റി, സാറ്റലൈറ്റ്, ഓവർസീസ് തുടങ്ങി സിനിമയുമായി ബന്ധപ്പെട്ട എല്ലാ അവകാശങ്ങളും ഇതിൽപ്പെടും.
സിനിമ നിര്‍മാതാവും പ്രവാസിയുമായ അനുരാഗ് അഗസ്റ്റസ് നല്‍കിയ സ്വകാര്യ അന്യായം പരിഗണിച്ചാണ് ഷൂട്ടിങ്ങ് നിർത്തി വെച്ചുള്ള ഇരിഞ്ഞാലക്കുട മുൻസിഫ് കോടതിയുടെ ഉത്തരവ് നേരത്തെ പുറത്തുവന്നത്. സബ്കോടതിയുടെ ഉത്തരവ് കഴിഞ്ഞ ഏപ്രിൽ 16നു ഹൈക്കോടതി സ്റ്റേ ചെയ്തിരുന്നു. ഈ സ്റ്റേയാണ് ഇപ്പോൾ നീട്ടിയിരിക്കുന്നത്.
അതിനിടയിൽ കടുവയുടെ രണ്ടാം ഷെഡ്യൂൾ കാഞ്ഞിരപ്പിള്ളിയിൽ ആരംഭിച്ചിരിക്കുകയാണ്. കടുവ നിര്‍മ്മിക്കുന്നത് പൃഥ്വിരാജ് പ്രൊഡക്ഷന്‍സും ലിസ്റ്റിന്‍ സ്റ്റീഫന്റെ ഉടമസ്ഥതയിലുള്ള മാജിക് ഫ്രെയിംസും ചേര്‍ന്നാണ്. കടുവയുടെ തിരക്കഥ ജിനു വി. എബ്രഹാമിന്റേതാണ്. അടുത്ത വർഷം വിഷു റിലീസായി ചിത്രം തിയറ്ററുകളിലെത്തിക്കാനാണ് ശ്രമം.
