വിനീത് ശ്രീനിവാസന്‍ രചിച്ചു സംവിധാനം ചെയ്ത പുതിയ ചിത്രമായ ഹൃദയം ആണ് ഇപ്പോള്‍ സോഷ്യല്‍ മീഡിയയുടെ ചര്‍ച്ചാ വിഷയം എന്ന് വേണമെങ്കില്‍ നമ്മുക്ക് പറയാം. യുവ താരം പ്രണവ് മോഹന്‍ലാല്‍ നായകനായി എത്തുന്ന ഈ ചിത്രം ഇന്ന് മലയാളി പ്രേക്ഷകര്‍ ഏറ്റവും കൂടുതല്‍ കാത്തിരിക്കുന്ന ചിത്രങ്ങളില്‍ ഒന്നായി മാറിക്കഴിഞ്ഞു. പതിനഞ്ചു പാട്ടുകള്‍ ഉള്ള ഇതിലെ എല്ലാ ഗാനങ്ങളും സൂപ്പര്‍ ഹിറ്റുകളാണ് എന്നതാണ് മറ്റൊരു പ്രത്യേകത. ഇത്രയും ഗംഭീരമായ ഒരു മ്യൂസിക് ആല്‍ബം മലയാള സിനിമയില്‍ ഈ അടുത്തകാലത്തെങ്ങും വന്നിട്ടില്ല എന്നതാണ് പ്രേക്ഷകരുടെ അഭിപ്രായം. ഇപ്പോഴിതാ അവരെ വീണ്ടും ആവേശം കൊള്ളിച്ചു കൊണ്ട് ചിത്രത്തിന്റെ ട്രൈലെര്‍ കൂടി ഇന്ന് റിലീസ് ചെയ്തിരിക്കുകയാണ്.
റിലീസ് ആയ നിമിഷം മുതല്‍ സോഷ്യല്‍ മീഡിയയില്‍ ട്രെന്‍ഡിങ് ആണ് ഹൃദയം ട്രൈലെര്‍. പ്രണവ് മോഹന്‍ലാല്‍ എന്ന നടന്‍ സോഷ്യല്‍ മീഡിയയുടെ ഹൃദയം കവര്‍ന്നു എന്ന് തന്നെ പറയാം. ഒരു ക്യാമ്പസ് ചിത്രമായും, പ്രണയ ചിത്രമായും, ഫീല്‍ ഗുഡ് ഡ്രാമ ആയുമെല്ലാം പ്രേക്ഷകരെ ആകര്‍ഷിക്കുന്ന ഒരു ചിത്രമായിരിക്കും ഹൃദയം എന്ന സൂചനയാണ് ഇതിന്റെ ട്രൈലെര്‍ നല്‍കുന്നത്. പാട്ടും തമാശയും അല്പം ആക്ഷനും ഒപ്പം പ്രണയവും വൈകാരിക നിമിഷങ്ങളുമെല്ലാം ഈ ചിത്രത്തിന്റെ ഭാഗമാണെന്നും ട്രൈലെര്‍ കാണിച്ചു തരുന്നു. ഏതായാലും ഇപ്പോള്‍ ഈ സിനിമ എത്താനുള്ള കാത്തിരിപ്പിലാണ് യുവ പ്രേക്ഷകരും പ്രണവ് ആരാധകരും.
മെറിലാന്‍ഡ് സിനിമാസിന്റെ ബാനറില്‍ വിശാഖ് സുബ്രഹ്മണ്യംനിര്‍മ്മിച്ച ഈ ചിത്രത്തിന് സംഗീതം ഒരുക്കിയത് ഹിഷാം അബ്ദുല്‍ വഹാബ് ആണ്. കല്യാണി പ്രിയദര്‍ശന്‍, ദര്‍ശന രാജേന്ദ്രന്‍, വിജയ രാഘവന്‍, അജു വര്‍ഗീസ് എന്നിവരും ഒട്ടേറെ പുതുമുഖങ്ങളും അഭിനയിച്ചിരിക്കുന്ന ഈ ചിത്രത്തിന് കാമറ ചലിപ്പിച്ചത് വിശ്വജിത്തും എഡിറ്റ് ചെയ്തത് രഞ്ജന്‍ അബ്രഹാമും ആണ്. ഒരുപാട് വര്‍ഷങ്ങള്‍ക്കു ശേഷം മെരിലാന്‍ഡ് സിനിമാസിന്റെ ബാനറില്‍ പുറത്തു വരുന്ന ചിത്രം കൂടിയാണ് ഹൃദയം.
