സംസ്ഥാനത്ത് കോവിഡ് വ്യാപനത്തെ തുടർന്ന് ഏർപ്പെടുത്തിയ നിയന്ത്രണങ്ങളിൽ ഇളവുകൾ വരുത്തി തുടങ്ങി. സംസ്ഥാനത്ത് കടുത്ത നിയന്ത്രണം ഏർപ്പെടുത്തേണ്ട ‘സി’ കാറ്റഗറിയിൽ ഈ ആഴ്ച കൊല്ലം ജില്ല മാത്രമാണ് ഉൾപ്പെട്ടിരിക്കുന്നത്. ഇതോടെ സംസ്ഥാനത്ത് സി കാറ്റഗറിയിൽ ഉൾപ്പെട്ട് തിയറ്ററുകൾ അടഞ്ഞുകിടന്നിരുന്ന ബാക്കി ജില്ലകളിലും തിയറ്ററുകൾ തുറക്കും. ഹൃദയം ഉൾപ്പെടെയുള്ള സിനിമകൾ ഇതോടെ കൂടുതൽ തിയറ്ററുകളിൽ പ്രദർശനത്തിന് എത്തും.
ബി കാറ്റഗറിയിൽ സംസ്ഥാനത്ത് പത്ത് ജില്ലകളാണ് ഉള്ളത്. എ കാറ്റഗറിയിൽ മലപ്പുറം, കോഴിക്കോട് ജില്ലകളാണ് ഉള്ളത്. കോവിഡ് ബാധിച്ച് ആശുപത്രിയിൽ പ്രവേശിക്കപ്പെട്ടവരുടെ എണ്ണം കണക്കാക്കിയാണ് ജില്ലകളെ തരം തിരിക്കുന്നത്. അതേസമയം, കാസർകോഡ് ജില്ലയെ ഒരു കാറ്റഗറിയിലും ഉൾപ്പെടുത്തിയിട്ടില്ല. അതേസമയം, കോവിഡ് സാഹചര്യത്തിൽ ഞായറാഴ്ചകളിൽ ഏർപ്പെടുത്തിയിരിക്കുന്ന ലോക്ക്ഡൗണിന് സമാനമായ നിയന്ത്രണങ്ങളിൽ ഇളവ് നൽകാനും തീരുമാനിച്ചു.
അതേസമയം, കോവിഡിന്റെ പശ്ചാത്തലത്തിൽ സി കാറ്റഗറി ജില്ലകളില്‍ സിനിമാ തിയറ്ററുകള്‍ അടച്ചിടാനുളള സര്‍ക്കാര്‍ തീരുമാനം ചോദ്യം ചെയ്തുളള ഹര്‍ജി ഹൈക്കോടതി പരിഗണിക്കുന്നത് തിങ്കളാഴ്ചത്തേക്ക് മാറ്റി. തിയറ്ററുകള്‍ തുറന്നു നല്‍കാനാകില്ലെന്നും അത് രോഗവ്യാപനം കൂട്ടുമെന്നും ആയിരുന്നു സംസ്ഥാന സര്‍ക്കാര്‍ നേരത്തെ സത്യവാങ്മൂലം നല്‍കിയിരുന്നത്. എന്നാൽ, മാളുകള്‍ക്ക് ഉൾപ്പെടെ ഇളവ് നല്‍കിയ ശേഷം തിയറ്ററുകള്‍ അടച്ചിട്ടത് വിവേചനപരമാണെന്നാണ് ഉടമകളുടെ നിലപാട്.
