“രണ്ടു സിനിമകൾക്ക് വേണ്ടി സുരേഷേട്ടനെ സമീപിച്ചിരുന്നു; പക്ഷേ എന്തുകൊണ്ടോ നടന്നില്ല” രഞ്ജിത്ത് ശങ്കർ

പ്രേക്ഷകർക്ക് അവരുടെ ജീവിതത്തോട് ചേർത്ത് നിർത്താവുന്ന നിരവധി സിനിമകൾ സമ്മാനിച്ച സംവിധായകനാണ് രഞ്ജിത്ത് ശങ്കർ. പാസ്സഞ്ചർ എന്ന ചിത്രത്തിലൂടെ മലയാള സിനിമയിൽ തന്നെ സമൂലമായൊരു മാറ്റം കൊണ്ടുവരുവാനും അദ്ദേഹത്തിന് സാധിച്ചു. സുരേഷ് ഗോപിയെ തന്റെ രണ്ടു സിനിമകളിൽ അഭിനയിക്കുവാൻ വേണ്ടി സമീപിച്ചെങ്കിലും നടക്കാതെ പോയ കാര്യം പങ്ക് വെച്ചിരിക്കുകയാണ് രഞ്ജിത്ത് ശങ്കർ.

എന്റെ തുടക്കക്കാലത്ത് എനിക്ക് എത്തിച്ചേരുവാൻ എളുപ്പം സാധിച്ചിരുന്ന സൂപ്പർസ്റ്റാറാണ് സുരേഷേട്ടൻ. 2008ൽ ഞാൻ ഓഫീസിലേക്ക് ഡ്രൈവ് ചെയ്‌ത്‌ പോകുമ്പോൾ അദ്ദേഹത്തെ ഫോൺ വിളിച്ചു. ഞാൻ പോകുന്ന ആ വഴിയിൽ തന്നെ ഷൂട്ട് നടക്കുന്നുണ്ടെന്നും ഇപ്പോൾ വന്നാൽ കാണാമെന്ന ലളിതമായ ഉത്തരമാണ് അദ്ദേഹം നൽകിയത്. പാസ്സഞ്ചറിൽ ഒരു ഗസ്റ്റ് റോളിന് വേണ്ടിയാണ് അന്ന് അദ്ദേഹത്തെ കാണാൻ പോയത്. പക്ഷേ അത് നടന്നില്ല. അർജുനൻ സാക്ഷിയിൽ ഫിറോസ് മൂപ്പനാകാൻ വേണ്ടിയും അദ്ദേഹത്തോട് സംസാരിച്ചിരുന്നു. എന്തുകൊണ്ടോ അതും നടന്നില്ല. അവസാനം തിരുവനന്തപുരത്ത് അദ്ദേഹത്തിന്റെ വസതിയിൽ വെച്ച് അദ്ദേഹത്തെ കണ്ടു. അന്ന് ജീവിതത്തെയും രാഷ്ട്രീയത്തേയും സിനിമയെക്കുറിച്ചുമെല്ലാം വളരെയേറെ സംസാരിച്ചു. ആ സമയത്ത് ഞാൻ ഡയറ്റിങ്ങിലായിരുന്നു. ഡയറ്റ് ഫുഡാണ് ഞാൻ കഴിക്കുന്നതെന്നും അദ്ദേഹം ഉറപ്പ് വരുത്തി. ഇനിയുമേറെ മനോഹരവും സമ്പന്നവുമായ വർഷങ്ങൾ പ്രിയപ്പെട്ട സുരേഷേട്ടന്റെ ജീവിതത്തിൽ ഉണ്ടാകട്ടെ.