ഒരു പക്കാ ഫാമിലി എന്റർടൈനർ ഉറപ്പ് നൽകി എത്തിയ ഇട്ടിമാണി മെയ്‌ഡ്‌ ഇൻ ചൈന ട്രെയ്‌ലർ പ്രേക്ഷകരുടെ മനം കവർന്ന് 1 മില്യൺ ഡിജിറ്റൽ വ്യൂസുമായി സോഷ്യൽ മീഡിയ നിറഞ്ഞു നിൽക്കുകയാണ്. ട്രെയ്‌ലറിൽ മാർഗംകളിക്ക് ചുവട് വെക്കുന്ന ലാലേട്ടനെ കണ്ട ആരാധകർ ചോദിക്കുന്നത് ‘ഈ പ്രായത്തിലും എന്തൊരു മെയ്‌വഴക്കം ആണ് എന്റെ ലാലേട്ടാ’ എന്നാണ്. ലൂസിഫറിന് ശേഷം ആശിർവാദ് സിനിമാസ് നിർമ്മിക്കുന്ന ചിത്രംകൂടിയാണിത്. യുവനടി ഹണി റോസാണ് ചിത്രത്തിൽ നായികയായി എത്തുന്നത്. ചിത്രത്തിൽ തൃശ്ശൂർ ഭാഷ സംസാരിക്കുന്ന കുന്നംകുളംകാരൻ മാണിക്കുന്നേൽ ഇട്ടി മാത്തന്റെ മകൻ ഇട്ടിമാണി ആയിട്ടാണ് മോഹൻലാൽ അഭിനയിക്കുന്നത്. മുഴുനീള കോമഡി ചിത്രമായി എത്തുന്ന സിനിമയിൽ മലയാളത്തിലെ മുൻനിര താരങ്ങളും വേഷമിടുന്നു.
നവാഗതരായ ജിബിയും ജോജുവും ചേർന്നാണ് ചിത്രം സംവിധാനം ചെയ്യുന്നത്. ഇവർ തന്നെയാണ് തിരക്കഥയും രചിച്ചിരിക്കുന്നത്. ഏറെ കാലത്തിന് ശേഷം മോഹൻലാൽ ഹ്യുമർ പരിവേഷമുള്ള കഥാപാത്രമായി എത്തുമ്പോൾ പ്രേക്ഷകരെ ആദ്യവസാനം രസിപ്പിക്കാനുള്ള വകകൾ ചിത്രത്തിൽ ഉണ്ടാകുമെന്ന് തന്നെയാണ് പ്രതീക്ഷിക്കുന്നത്.
