ചുരുളി സിനിമ കാരണം ലാഭമുണ്ടായത് ഹെഡ്സെറ്റ് കമ്പനിക്കാർക്ക് ആണെന്ന് നടൻ ജാഫർ ഇടുക്കി. തന്റെ അറിവിൽ ഇരുപത്തിയഞ്ച് കോടി ഹെഡ്സെറ്റ് ചെലവായെന്ന് ജാഫർ ഇടുക്കി പറഞ്ഞു. റിപ്പോർട്ടർ ടിവിക്ക് നൽകിയ അഭിമുഖത്തിൽ ആയിരുന്നു ഇദ്ദേഹത്തിന്റെ പ്രതികരണം. ‘എന്റെ അറിവിൽ ഒരു പത്തിരുപത്തിയഞ്ച് കോടി ഹെഡ്സെറ്റ് ചെലവായിട്ടുണ്ട്. ഒരു വീട്ടിൽ അച്ഛനും അമ്മയും മക്കളുമുണ്ടെങ്കിൽ ഇവർ ഒരു ഹെഡ്സെറ്റല്ല ഉപയോഗിക്കുന്നത്. അഞ്ച് പേരുണ്ടെങ്കിൽ അഞ്ച് പേരും അഞ്ച് ഹെഡ്സെറ്റ് ആണ് ഉപയോഗിക്കുന്നതെന്നും ജാഫർ ഇടുക്കി പറഞ്ഞു.
അച്ഛനും അമ്മയും ചിലപ്പോൾ ഒറ്റയ്ക്കിരുന്ന് സിനിമ കാണുമായിരിക്കും. പക്ഷേ, കല്യാണം കഴിക്കാത്ത മകൾ വന്ന് ഹെഡ്സെറ്റ് ചോദിച്ചാൽ അച്ഛൻ കൊടുക്കില്ല. ഹെഡ്സെറ്റ് ചോദിച്ചാൽ അച്ഛൻ ചോദിക്കും നിനക്ക് മറ്റേ പടം കാണാനല്ലേയെന്ന്. അപ്പോൾ എല്ലാവരും ഹെഡ്സെറ്റ് മേടിക്കുമെന്നും ജാഫർ ഇടുക്കി പറഞ്ഞു. ചുരുളി സിനിമ കൊണ്ട് ഹെഡ്സെറ്റ് കമ്പനിക്കാർ ഭയങ്കരമായി വിജയിച്ചെന്നും അദ്ദേഹം പറഞ്ഞു.
സിനിമയെ വിമർശിക്കുന്നവരോട് നന്ദിയുണ്ടെന്നും അദ്ദേഹം പറഞ്ഞു. വിമർശിക്കുന്നവർ വിമർശിച്ചോട്ടെയെന്നും പക്ഷേ പഠിച്ചിട്ട് വിമർശിക്കണമെന്നും ജാഫർ ഇടുക്കി പറഞ്ഞു. ലിജോ ജോസ് പെല്ലിശ്ശേരിയുടെ സിനിമയായ ചുരുളി റിലീസ് ചെയ്തതിന് പിന്നാലെ ചിത്രത്തിലെ തെറിവിളിക്ക് എതിരെ വിമർശനം ഉയർന്നിരുന്നു. ചിത്രത്തെ അനുകൂലിച്ചും പ്രതികൂലിച്ചും ചേരി തിരിഞ്ഞ് തർക്കങ്ങൾ രൂപപ്പെട്ടിരുന്നു. ചെമ്പന്‍ വിനോദ് ജോസ്, വിനയ് ഫോര്‍ട്ട്, ജാഫര്‍ ഇടുക്കി എന്നിവരെ കേന്ദ്ര കഥാപാത്രങ്ങളാക്കിയാണ് ലിജോ ജോസ് പെല്ലിശ്ശേരി ചുരുളി സംവിധാനം ചെയ്തത്. ലിജോ പെല്ലിശ്ശേരീസ് മൂവി മൊണാസ്ട്രിയും ചെമ്പോസ്‌കിയും ഒപസ് പെന്റയും ചേര്‍ന്നാണ് ചുരുളി നിര്‍മ്മിച്ചത്.
