മലയാള സിനിമയ്ക്ക് എന്നും മികച്ച സിനിമകൾ സംഭാവന ചെയ്ത പ്രൊഡക്ഷൻ ഹൗസ് ആണ് ഫ്രൈഡേ ഫിലിം ഹൗസ്. മികച്ച സിനിമകളോടൊപ്പം തന്നെ മികച്ച നവാഗത സംവിധായകരേയും ഫ്രൈഡേ ഫിലിം ഹൗസ് മലയാള സിനിമയ്ക്ക് സംഭാവന ചെയ്തിട്ടുണ്ട്. ഇപ്പോഴിതാ നവാഗതസംവിധായകർക്കും നവാഗത സിനിമാ കൂട്ടായ്മയ്ക്കും വേണ്ടി മാത്രമായി പുതിയ ഒരു പ്രൊഡക്ഷൻ ഹൗസ് തുടങ്ങുകയാണ് ഫ്രൈഡേ ഫിലിം ഹൗസ്. ഫ്രൈഡേ ഫിലിം ഹൗസ് എക്സ്പെരിമെന്റ്‌സ് എന്ന് പേരിട്ടിരിക്കുന്ന പ്രൊഡക്ഷൻ ഹൗസ് ഇനി നവാഗതരായ സംവിധായകരുടെ സിനിമകൾ മാത്രമായിരിക്കും നിർമ്മിക്കുക. ഫ്രൈഡേ ഫിലിം ഹൗസ് ആകട്ടെ മറ്റു സിനിമകളും നിർമ്മിച്ച് തിയേറ്ററുകളിലെത്തിക്കും.
വളർന്നുവരുന്ന കഴിവുറ്റ കലാകാരന്മാരെ പ്രോത്സാഹിപ്പിക്കുക എന്ന ഉദ്ദേശത്തോടുകൂടിയാണ് വിജയ് ബാബു ഈ പുതിയ സംരംഭം ആരംഭിക്കുന്നത്. ഈ സംരംഭത്തിലെ ആദ്യചിത്രത്തിന്റെ പ്രഖ്യാപനം കഴിഞ്ഞ ദിവസം ജൂൺ സിനിമയുടെ നൂറാം ദിന ആഘോഷ പരിപാടിയിൽ വിജയ് ബാബു നിർവഹിച്ചു. ജനമൈത്രി എന്നാണ് ചിത്രത്തിന് പേര്. ചിത്രത്തിൽ ബിഗ് ബോസ് ഫെയിം സാബുമോൻ അബ്ദുസമദ് ആയിരിക്കും പ്രധാന കഥാപാത്രങ്ങളിൽ ഒരാളെ അവതരിപ്പിക്കുക.സൈജു കുറുപ്പ്, വിജയ് ബാബു, ഇന്ദ്രൻസ് തുടങ്ങിയവരാണ് മറ്റു താരങ്ങൾ.ചിത്രത്തിന്റെ ഫസ്റ്റ് ലുക്ക് പോസ്റ്റർ ഇപ്പോൾ പുറത്ത് വിട്ടിരിക്കുകയാണ് അണിയറ പ്രവർത്തകർ. ഒരു മുഴുനീള കോമഡി ചിത്രമായിരിക്കും ഇതെന്ന് ഉറപ്പ് നൽകുന്നതാണ് പോസ്റ്റർ.നവാഗതനായ ജോൺ മന്ത്രിക്കൽ ആണ് ചിത്രം സംവിധാനം ചെയ്യുന്നത്. വിഷ്ണുനാരായണൻ ചായാഗ്രഹണവും ഷാൻ റഹ്മാൻ ഞാൻ സംഗീതവും നിർവഹിക്കുന്നു. ചിത്രം ഉടൻ തിയേറ്ററുകളിലെത്തും.
